АҚШ президенти Дональд Трамп Украина президенти Владимир Зеленскийга урушни якунлаш бўйича АҚШ таклиф қилган режа барибир маъқул бўлиши кераклигини айтди. Унинг сўзларини ТАСС келтирган.

«Бизда тинчликка эришишнинг йўли бор, у бу режа­ни маъқуллашига тўғри келади», — деди Трамп Оқ уйда журналистлар билан суҳбат давомида.

Трампдан, агар Зеленский режа­ни маъқулламаса, АҚШ Украинага кўмакни тўхтатадими, деб сўрашди.

«Эртами-кечми унга ниманидир қабул қилишга тўғри келади», — дея жавоб берди Америка раҳбари ва Киевнинг тезроқ қарор қилиши лозимлигини урғулади.

Бундан аввал Украина Олий Радаси депутати Алексей Гончаренко АҚШ томонидан таклиф этилган тинчлик режасини эълон қилганди. Ушбу режа 28 банддан иборат бўлиб, улар орасида Украина НАТОга кирмаслиги, ҳужжат имзолангандан 100 кун ўтиб сайлов ўтказилиши ва Қрим, Луганск ҳамда Донецкнинг де-факто Россия таркибида мустаҳкамланиши каби талаблар бор.

Зеленский эса Украина урушни тугатиш бўйича АҚШ ва бошқа ҳамкорлар билан ишлашини, конструктив ечимлар излашини ҳамда Вашингтоннинг тинчлик режасидаги талаблар ўрнига муқобил таклифлар беришини маълум қилган.