Фото: Reuters

АҚШнинг Маями шаҳридан Лос-Анжелес шаҳрига учган бокс афсонаси Майк Тайсон фавқулодда касалхонага олиб кетилди. Бу ҳақда «Los Angeles Times» хабар берди.

Гувоҳларнинг айтишича, самолёт қўнишига ярим соатдан кўпроқ вақт қолган бир пайтда «бортда шифокор борми», деган эълон янграган. Учоқ аэропортга қўниши билан Тайсон тўғри тез ёрдам машинасида шифохонага олиб кетилган.

Боксчининг вакили «The New York Post» нашрига берган интервьюсида «Темир Майк»да ҳозир ҳаммаси ҳаммаси кўнгилдагидек эканини маълум қилган.

«Жаноб Тайсонда ҳаммаси жойида. Қўнишимизга 30 дақиқада қолган бир пайтда Майкнинг ошқозонидаги яраси безовта қила бошлади. Бунинг натижасида бош айланиши, чанқоқдан оғиз қуриши ҳолатлари юзага келди. Бахтимизга ҳаммаси кўнгилдагидек ўтди. Самолёт бортида бизга биринчи ёрдамни берган, кейинчалик шифохонада ғамхўрлик қилган тиббиёт ходимларига раҳмат айтамиз», деган боксчининг вакили.

Маълумот учун, Майк Тайсон шу йилнинг 20 июль куни Арлингтонда Жейк Полга қарши жангда қатнашиши керак эди. Мазкур воқеа унинг жангига таъсир ўтказадими-йўқми, ҳозирча номаълум.