Prezident Shavkat Mirziyoyevning Tojikistonga tashrifi doirasidagi muzokaralarda Oʻzbekiston va Tojikiston davlat rahbarlarining siyosiy irodasi va birgalikdagi saʼy-harakatlari tufayli oʻzaro manfaatli va teng huquqli amaliy hamkorligimiz sifat jihatdan yangi darajasiga koʻtarilgani qayd etildi.

Taʼkidlash joizki, ayni kunda mamlakatimizdagi uch yuzga yaqin umumtaʼlim maktabida tojik tilida ham dars beriladi. Bir qator oʻrta va oliy taʼlim muassasalarida, jumladan, Samarqand va Termiz davlat universitetlarida tojik filologiyasi boʻyicha kadrlar tayyorlash yoʻlga qoʻyilgan. Toshkent shahri va viloyatlarda tojik madaniyat markazlari samarali faoliyat yuritmoqda.

Oʻnga yaqin tuman va shahar gazetalarida tojik tili sahifalari bor. Markaziy va hududiy teleradiokanallarda tojik tilida koʻrsatuv va radio eshittirishlar tayyorlanib efirga uzatilmoqda. Oʻtgan yili Samarqand shahrida nashr etiladigan viloyat hokimligining “Ovozi Samarqand” gazetasining 30 yilligi keng nishonlandi. Ushbu tahririyat jamoasi Oʻzbekiston Jurnalistlari ijodiy uyushmasi tomonidan oʻtkazib kelinayotgan “Oltin qalam” tanlovining matbuot yoʻnalishi boʻyicha gʻolibi hisoblanadi.

Oʻzbekiston Jurnalistlari ijodiy uyushmasi tomonidan yurtimizda turli tillarda faoliyat olib borayotgan ommaviy axborot vositalari, ularda mehnat qilayotgan xodimlarni qoʻllab-quvvatlashga alohida eʼtibor qaratib kelinmoqda. Tojik, qozoq va boshqa tillarida faoliyat olib boradigan ommaviy axborot vositalarida samarali mehnat qilib kelayotgan isteʼdodli, qalami oʻtkir jurnalistlar uyushma tomonidan moddiy va maʼnaviy ragʻbatlantirib kelinayotgani fikrimizni tasdiqlaydi.

Uyushma tomonidan oʻtkazib kelinayotgan ana shunday tadbirlarning navbatdagisi “Ovozi tojik” va “Nurli jol” gazetalari tahririyatlarida boʻlib oʻtdi. Bu haqda Jurnalistlar uyushmasi axborot xizmati xabar berdi.

«Unda uyushma raisi Olimjon Oʻsarov koʻp millatli mamlakatimizda  matbuot va soʻz erkinligini taʼminlash borasidagi islohotlar ortga qaytmas tus olgani, uyushma tomonidan OAV vakillarini har jihatdan qoʻllab-quvvatlash borasida izchil ishlar davom ettirilishini alohida taʼkidladi.

Tadbir doirasida Oʻzbekiston Jurnalistlari ijodiy uyushmasi  tomonidan “Ovozi tojik” va “Nurli jol” gazetalari tahririyatlariga zamonaviy kompyuter toʻplamlari sovgʻa qilindi. Shuningdek, Uyushma aʼzoligiga qabul qilingan “Ovozi tojik” gazetasi bosh muharriri Sherpoʻlat Vakilov, tahririyat masʼul kotibi Aʼlam Narziyev  hamda Nurli jol» gazetasi bosh muharriri Gʻulomzokir Yusupov, gazeta boʻlim muharriri Jannat Moldashevalarga aʼzolik guvohnoma hamda aʼzolik koʻkrak nishonlari tantanali ravishda topshirildi», deyiladi xabarda.