Jizzax shahri markazidan oqib oʻtuvchi Sangzor daryosi yoqasida joylashgan bogʻ hududida atoqli Oʻzbek shoiri Hamid Olimjonning haykali rekonstruksiya qilindi, atrofi obodonlashtirildi va viloyat qoʻgʻirchoq teatrining yangi binosi qurib foydalanishga topshirildi.

Teatr va yangi bogʻ ochilishida dastlab soʻzga chiqqan Jizzax viloyat hokimi Ergash Saliyev yigʻilganlarni Hamid Olimjonning ijodi, uning oʻzbek xalqiga qoldirgan adabiy merosi haqida soʻzladi, shuningdek yangi qoʻgʻirchoq teatrining viloyatdagi bolajonlarning kelajakda ajoyib insonlar boʻlib yetishishida uning roli katta boʻlishini taʼkidladi.

— Men keyingi yillarda Jizzax viloyatida olib borilayotgan obodonlashtirish ishlari, madaniy yodgorliklarni saqlash va ularni taʼmirlash, yangilarini barpo etishda faol ishtirok uchun oʻz minnatdorchiligimni bildiraman, — deydi tadbirda ishtirok etgan Oʻzbekiston Respublikasi Madaniyat vaziri Ozodbek Nazarbekov. — Shuning uchun yangi bunyod etilgan viloyat qoʻgʻirchoq teatri jamoasiga yangi “Damas” avtomashinasi kalitini topshirmoqchiman.

Tadbir ochilish marosimidan soʻng yangi teatrning 230 kishilik tomoshalar zalida bolajonlar uchun Toshkent shahridan tashrif buyurgan ijodkorlar tomonidan sahnalashtirilgan tomoshalar qoʻyildi.

Tolibjon ERGASHEV,
(“Xalq soʻzi”).