Bugun, 9-fevral kuni Toshkent shahrida Maktabgacha taʼlim tizimida bolalarga robototexnika va dasturlashni oʻrgatish uchun Albert robotlarini topshirish marosimi boʻlib oʻtdi.

Maktabgacha yoshdagi bolalarni robototexnika boʻyicha maqsadli tizimli oʻqitish maktabga tayyorgarlik koʻrishda muhim rol oʻynaydi, oʻrganish, natijalarga erishish va axborot-innovatsion makonda yangi bilimlarni egallash koʻnikmalarini shakllantirish va rivojlantirishga yordam beradi.

Tadbir Maktabgacha taʼlim vazirligi va vazirlik huzuridagi Axborot-pedagogik texnologiyalar innovatsion markazi va shu qatorda kompaniyalar vakillari ishtirokida onlayn tarzda oʻtkazildi.

Shuningdek, tadbirda Koreya Respublikasining bir qator kompaniyalari vakillari ham ishtirok etdi.

Koreyalik hamkorlar maktabgacha taʼlim muassasalari oʻqituvchilari va tarbiyalanuvchilari uchun 275 ta yangi avlod Albert robotlari va oʻzbek tilidagi 350 ta oʻquv qoʻllanmasini sovgʻa qildi.

Ushbu pilot loyihaning maqsadi maktabgacha taʼlim muassasalari bolalarida robototexnika va dasturlashning dastlabki koʻnikmalarini shakllantirish va axborot-kommunikatsiya texnologiyalariga qiziqish uygʻotishdir.