Foto: Moliya vazirligi

Jahon banki ijrochi direktorlar kengashi Oʻzbekiston uchun 100 million dollar miqdorida imtiyozli kreditni tasdiqladi. Ushbu mablagʻlar “Aholining ijtimoiy himoyaga muhtoj qatlamlarini ijtimoiylashuvini taʼminlash uchun innovatsion ijtimoiy himoya tizimi” (“Inson”) loyihasini amalga oshirish uchun taqdim etiladi.

Loyihaning maqsadi aholining ijtimoiy himoyaga muhtoj qatlamlariga mansub odamlar uchun ijtimoiy xizmatlardan foydalanish imkoniyati va ularning sifatini yaxshilashdir.

Loyiha qoʻshimcha ravishda Jahon banki qoshidagi “Erta yoshdagi taʼlim uchun hamkorlik” koʻp tomonlama donorlik trast jamgʻarmasi tomonidan taqdim etilgan 2 million dollarlik grant vositasida moliyalashtiriladi.

Jamgʻarma faoliyati dunyoning turli mamlakatlaridagi ijtimoiy himoyaga muhtoj bolalarning rivojlanishi va taʼlimini qamrab oladi. Ushbu mablagʻlar mahalliy jamoalar (mahallalar) darajasida koʻrsatilayotgan ijtimoiy xizmatlarning Oʻzbekistondagi ijtimoiy himoyaga muhtoj bolalar farovonligiga taʼsirini baholash va ularning sifatini oshirish uchun yoʻnaltiriladi.

“Biz Oʻzbekiston hukumatining ijtimoiy himoyaga muhtoj aholini har tomonlama va samarali qoʻllab-quvvatlash maqsadida milliy ijtimoiy himoya tizimi salohiyatini rivojlantirishga qaratilgan saʼy-harakatlarini olqishlaymiz. Loyiha Oʻzbekistonda “gʻamxoʻrlik iqtisodiyoti” sektorining huquqiy va institutsional asoslarini rivojlantirishga koʻmaklashadi», deydi Jahon bankining Oʻzbekistondagi vakolatxonasi rahbari Marko Mantovanelli.

Loyiha Oʻzbekiston prezidenti huzuridagi Ijtimoiy himoya milliy agentligi (IHMA) tomonidan mamlakatning turli davlat organlari, nodavlat tashkilotlari va ijtimoiy-iqtisodiy rivojlanish masalalari boʻyicha xalqaro hamkorlar bilan amalga oshiriladi.

Prezident huzurida Ijtimoiy himoya milliy agentligi davlat rahbarining 2023-yil 1-iyundagi farmoni bilan tashkil etilgandi. Uning Qoraqalpogʻiston Respublikasi, viloyatlar va Toshkent shahar boshqarmalari hamda tuman (shahar)larda “Inson” ijtimoiy xizmatlar markazlari ham tashkil etildi.