Istam IBROHIMOV/“Xalq soʻzi”. Oʻzbekiston Yozuvchilar va Jurnalistlar uyushmalari aʼzosi Joʻra Fozil tavalludining 75-yilligi munosabati bilan Buxoro davlat universitetida ijodiy uchrashuv tashkil qilindi. Yurtimiz boʻylab oʻtayotgan “Maʼrifat ulashib” loyihasi doirasidagi tadbirda adabiyot ixlosmandlari, talaba – yoshlar, davlat va nodavlat tashkilotlari vakillari ishtirok etishdi.

Aytish joizki, Joʻra Fozilning butun umri bevosita jurnalistika bilan bogʻliq. U mehnat faoliyatini Romitan tuman bosmaxonasida harf teruvchilikdan boshlagan. Tuman gazetasida musahhih, adabiy xodim, masʼul kotib, muharrir oʻrinbosari, muharrir vazifalarida ishlagan. Gazetachilik mashaqqatlarini boshidan kechirgan bu qalamkash oʻzining publitsistik maqolalari, ocherk va felyetonlari bilan el-yurtga tanildi. Badiiy ijodni ham kanda qilmagan adibning shu kunga qadar “Muhabbatning bayramlari”, “Barqut mavsum”, “Buxoro elchisi”, “Ayriliq ostonasi” singari qator nasriy asarlari chop etilgan. U taniqli rus yozuvchilari V. Astavyevning “Gʻamgin sarguzasht”, K. Paustovskiyning “Sevgi” romanlarini tarjima qilgan. Bu ikki asar yurtimizda nashr etilgan “Rus adabiyoti durdonalari” 100 jildligidan ham oʻrin olgan. J. Fozilning “Doʻstga zor boʻlgan kuning” hikoyasi asosida Qozogʻiston kino ustalari tomonidan badiiy film suratga olingan.

Ijodkorning zahmatli mehnati davlatimiz tomonidan munosib taqdirlanganini ham taʼkidlash maqsadga muvofiqdir. U “Doʻstlik” ordeni sohibi sanaladi.

Adabiyot bayramiga aylangan maʼnaviy-maʼrifiy tadbirda kitobxonlik madaniyati, milliy qadriyatlarimizni asrab-avaylash haqida joʻyali fikr-mulohazalar bildirildi. Zahmatkash adib asarlarida inson tabiati, haqiqat va adolat tarozusi, chigal taqdirlar oʻziga xos yoʻsinda ochib berilgani taʼkidlandi. Tashkilotchilar tomonidan tabarruk yoshni qarshilagan yozuvchiga hurmat-ehtirom koʻrsatildi.