Chet tilini oʻqitishga eʼtibor tufayli xususiy til markazlari soni 6 mingdan ortdi. Bugungi kunda 1,5 million yoshlarimiz boʻsh vaqtini chet tilini oʻrganishga bagʻishlamoqda.

Lekin shu bilan birga, yaqinda 100 ming nafar yoshlar oʻrtasida oʻtkazilgan soʻrovnomada yoshlar futbol, voleybol, stol tennisi va badminton kabi sport turlari bilan shugʻullanishga qiziqishi, boʻsh vaqtini kibersport bilan oʻtkazishini, kitobxonlik, musiqa, raqs, karaoke, teatr va kino boʻyicha infratuzilmaga ehtiyoj borligini aytgan, oilaviy aylanish uchun xiyobon va sayilgohlar tashkil etilishini soʻragan.

Shu munosabat bilan viloyat markazlarida, keyinchalik tumanlarda butun hafta kechayu kunduz ishlaydigan “Yoshlar sayilgohlari”ni tashkil etish topshirildi.

Bu joylarda kibersport, sport va intellektual oʻyingohlar, karaoke klublari, teatr, moda podiumlari, buk-kafe, kovorkinglar va boshqa koʻngilochar joylar tashkil etilishi kerakligi koʻrsatib oʻtildi.

Istirohat bogʻlari, xiyobonlarda ijodiy va kino kechalari, raqslar, diskotekalar, viktorinalar, “Quvnoqlar va zukkolar” va boshqa bilimga chorlaydigan va koʻngilochar, tomoshabinlar talabiga mos tadbirlarni yoʻlga qoʻyish topshirildi.