Foto: Kyodo

Besh kundan beri Yaponiyada soʻnggi yarim asrdagi eng yirik oʻrmon yongʻinlari davom etmoqda.

Yongʻin Ivate prefekturasining Ofunato hududida 2600 gektarga yaqin maydonni qamrab olgan. Buning oqibatida hukumat 4000 ga yaqin odamni evakuatsiya qilishga majbur boʻldi. Dastlabki maʼlumotlarga koʻra, bir kishi hayotdan koʻz yumgan, oʻnlab binolar vayron boʻlgan.

Yongʻin fevral oyidan soʻngi kunlari boshlangan. Bunga oʻsha paytda Ofunato atigi 2,5 mm yogʻingarchilik kuzatilgani sabab boʻlgan. Bu oʻrtacha oylik meʼyor — 41 mm.dan ancha past. Ayni paytda 2000 ga yaqin oʻt oʻchiruvchi va harbiy xizmatchilar, jumladan Tokiodan qoʻshimcha kuchlar ham yongʻin bilan kurashmoqda. Osmonda vertolyotlar ishlamoqda. Biroq ob-havo sharoiti yongʻinni oʻchirishga toʻsqinlik qilmoqda. Ayni kunlarda hududda qor yogʻishi kutilmoqda, u yomgʻirga aylanishi ham mumkin.

Yongʻin nafaqat aholi turar joylari, balki korxonalarga ham taʼsir koʻrsatdi. Xususan “Tayxeyyo sement” zavodi oʻz faoliyatini vaqtincha toʻxtatdi, mahalliy “Saitoseika” qandolat fabrikasi esa tahdid kuchaysa, yopilishi mumkinligi haqida ogohlantirdi.