Foto: Akmal Muhammadov/“Xalq soʻzi”

Bugun, 5-sentyabr kuni Toshkent shahrida barpo etilgan “Olimpiya shaharchasi” majmuasida “Yangi Oʻzbekiston Olimpiya choʻqqilari” sport musobaqalarining yakunlangan bosqichlarida erishilgan natijalar va kelgusidagi rejalarga bagʻishlangan matbuot anjumani boʻlib oʻtdi.

​

Matbuot anjumanida Sport vazirligi va Milliy olimpiya qoʻmitasi rahbariyati, masʼullar va ommaviy axborot vositalari vakillari ishtirok etdi.

​

​

Oʻzbekiston Respublikasi Prezidenti Shavkat Mirziyoyevning tashabbusi bilan milliy terma jamoalarga sportchilarni quyi boʻgʻinlardan saralash va seleksiya qilishga qaratilgan uch bosqichli, jumladan, 1-bosqich — “Mintaqaviy bosqich”, 2-bosqich — “Hududiy bosqich” hamda 3-bosqich – “Prezident Olimpiadasi” bosqichi “Yangi Oʻzbekiston Olimpiya choʻqqilari” sport musobaqalari tizimi yoʻlga qoʻyildi.

​

​

Ilk marotaba tashkil etilgan musobaqalar 10 ta olimpiya sport turlari, boks, dzyudo, taekvondo, ogʻir atletika, erkin kurash, yunon-rum kurashi, yengil atletika, badiiy gimnastika, stol tennisi, basketbol 3x3 boʻyicha 15-17 yoshdagi sportchilar oʻrtasida oʻtkazildi.

Musobaqalarda ishtirok etish jarayonlari toʻliq raqamlashtirilib, ishtirokchilar “ERP.sport” tizimida roʻyxatdan oʻtkazildi va erishgan sport natijalarini qayd etib borish tizimi yoʻlga qoʻyildi.

​

​

Joriy yilning may-iyun oylarida oʻtkazilgan “Mintaqaviy bosqich” musobaqalarida sport maktablari, umumtaʼlim maktablari toʻgaraklari va sport klublarining 103,1 ming nafar shugʻullanuvchi sportchilari ishtirok etdi.

​

​

Ishtirokchilarning 59 foizini (60,8 ming) umumtaʼlim maktablari toʻgaraklari va sport klublari sportchilari tashkil etdi. Ishtirokchilarning 35 foizi (36,7 ming) sportchi qizlardan tashkil topgan.

​

​

“Yangi Oʻzbekiston Olimpiya choʻqqilari” 2-bosqichi, “Hududiy bosqich” musobaqalari joriy yilning avgust oyida oʻtkazildi. Ushbu bosqichda 1-bosqichda saralab olingan 13,3 ming nafar sportchilar hamda ixtisoslashtirilgan sport maktabi, davlat ixtisoslashgan maktab internati, mahorat maktablarining 6,3 ming nafar shugʻullanuvchilari ishtirok etdi.

​

​

Ushbu musobaqalarning ochilish va taqdirlash marosimlarida viloyat va shahar hokimlari ishtirok etib sportchilarga medal va sovgʻalar topshirdi.

“Hududiy bosqich” musobaqalarida 1-oʻrinni qoʻlga kiritgan 1,9 ming nafar sportchilar musobaqaning mantiqiy davomi hisoblangan “Prezident Olimpiadasi”da ishtirok etish huquqini qoʻlga kiritdi.

​

“Prezident Olimpiadasi” joriy yil dekabr oyida zamonaviy va xalqaro talablar asosida yangidan barpo etilgan “Olimpiya shaharchasida” boʻlib oʻtadi.

“Prezident Olimpiadasi”da 1,9 ming nafar 2-bosqich gʻoliblari bilan bir qatorda hududlardagi 15 ta olimpiya va paralimpiya markazlarining oʻquvchi sportchilari ishtirok etishi rejalashtirilgan.

​

​

Ulardan, 1-2 oʻrinlarni egallagan sportchilar Respublika olimpiya va paralimpiya markaziga hamda 3-oʻrinni egallagan sportchilar Hududiy olimpiya va paralimpiya markazlariga joylashtiriladi.