Oliy Majlis Qonunchilik palatasi Spikerining oʻrinbosari, “Milliy tiklanish” DP MK raisi Alisher Qodirov universitetlarga topshirgan abituriyentlarning soni kamayganiga oʻz fikrini bildirdi.

“Oliy taʼlim olish uchun murojaatning sezilarli kamaygani yoshlarimizni quyidagi xulosalarga kelganini koʻrsatadi deb oʻylayman: Birinchi, oliy maʼlumot haqidagi diplom yaxshi yashash uchun kafolat emas. Ikkinchi, sotib olingan baholar, natijada diplom malaka va mutaxassislikni paydo qilib qoʻymaydi. Uchinchi, diplom real raqobat muhitida yordam bermaydi”, degan u.

Avvalroq siyosatchi oʻz postlarining birida oliy maʼlumot qobiliyat va imkoniyat talab qiladigan, jiddiy majburiyat yuklaydigan qimmat mahsulot ekanligini taʼkidlagandi.

Alisher Qodirovning fikricha, maktabni soʻnggi sinflari va maktabni tugatgandan keyin yoshlarga raqobatbardosh kasb-hunar oʻrgatadigan, qisqa, arzon va samarali tizim yaratilishiga jiddiy eʼtibor qaratilishi kerak.

Avvalroq “Milliy tiklanish” DP MK raisi jamiyatdagi otalik mavqeyi haqda jiddiy chiqish qilgandi.