Oʻzbekiston elchisi Oybek Shaxavdinov Vengriyaning sport olamida mashhur Sportfive Hungary kompaniyasi bosh direktori Andrash Igaz bilan uchrashdi. Bu haqda "Dunyo" axborot agentligi xabar berdi.

Qayd etilishicha, uchrashuvda Oʻzbekistonda futbol infratuzilmasini yanada rivojlantirishda oʻzaro hamkorlikni yoʻlga qoʻyish imkoniyatlari muhokama qilindi.

Andrash Igaz Oʻzbekiston tomoni bilan futbol infratuzilmasini rivojlantirish yoʻnalishida hamkorlik qilishga tayyorligini bildirdi. Sportfive Hungary kompaniyasi butun dunyo boʻylab stadionlarni loyihalash, qurish va sport inshootlarini operativ boshqaruvini amalga oshiradi, savdo va marketing bilan shugʻullanadi. Shuningdek, mazkur kompaniya Vengriyada ikkita stadionni boshqaradi va “Ferensvarosh” futbol klubiga homiylik qiladi.

Muloqot davomida Budapeshtda Oʻzbekiston va Vengriya futbol klublari oʻrtasida oʻrtoqlik uchrashuvini tashkil qilish, futbolchilarni xorijga transfer qilish va stadionlarni operativ boshqarish yoʻnalishlarida aloqalarni yoʻlga qoʻshish masalalariga alohida eʼtibor qaratildi.