Arxiv foto

AQSH giyohvand moddalar savdosiga qarshi kurash mavzusidan Venesuelaga qarshi tajovuz tayyorlash va uning energiya resurslari ustidan nazorat oʻrnatishga intilish uchun niqob sifatida foydalanmoqda. Bu fikrlarni Venesuela Milliy assambleyasi deputati Xulio Chaves aytib oʻtdi.

“Butun dunyo tushunishi kerakki, AQSH Karib dengizi janubida rejalashtirayotgan bu harbiy operatsiya narkotik moddalar savdosiga qarshi kurashga hech qanday aloqasi yoʻq. Bu prezident Nikolas Maduroning konstitutsiyaviy hukumatiga qarshi tajovuzni oqlash uchun qoʻpol manipulyatsiya, chunki Venesuela sayyoradagi eng katta energiya zaxirasiga ega”, — deydi Chaves.

Oʻtgan hafta Donald Tramp maʼmuriyati 4000 nafar askar bilan uchta harbiy kemani Karib dengizi janubiga joʻnatdi va bu operatsiya AQSHga giyohvand moddalarni tashishning oldini olishga qaratilganini aytdi. Karakasga koʻra, AQSHning harakatlari nafaqat respublikaning oʻziga, balki 2014-yilda Lotin Amerikasi va Karib havzasi davlatlari hamjamiyati tomonidan tinchlik hududi deb eʼlon qilingan butun mintaqa barqarorligiga tahdid soladi.

Venesuelaning hukmron Yagona sotsialistik partiyasi vakili boʻlgan Chaves mamlakat noqonuniy ekinlardan xoli hudud ekanligini taʼkidladi. Buni AQSH yaxshi biladi – giyohvand moddalar savdosining asosiy yoʻnalishlari Tinch okeani, Karib dengizi va Atlantika okeani orqali oʻtadi va Venesuela, BMT maʼlumotlariga koʻra, noqonuniy ekinlari boʻlmagan hudud sifatida tan olinadi.

Avvalroq, Venesuela ichki ishlar, adliya va tinchlik vaziri Diosdado Kabello BMTning Narkotiklar va jinoyatchilik boʻyicha boshqarmasi tomonidan tayyorlangan Jahon narkotiklar hisobotiga koʻra, Venesuela noqonuniy ekinlardan xoli ekanligini maʼlum qilgandi. Uning soʻzlariga koʻra, Kolumbiyadan kelayotgan giyohvand moddalarning 87 foizi Tinch okeani yoʻli orqali, yana sakkiz foizi Karib dengizi mintaqasi orqali joʻnatiladi va faqat besh foizi Venesuela hududi va suvlari orqali olib oʻtishga harakat qilinmoqda.

Chavesning soʻzlariga koʻra, Vashingtonning harakatlari faqat mamlakatda keskinlik yaratishga qaratilgan. Chunki hukumatga bosim oʻtkazishning avvalgi mexanizmlarining hech biri ishlamagan. Endi esa harbiy amaliyotlar yordamida ular “tinchlik va osoyishtalikda yashayotgan mamlakatga tashvish urugʻlarini sepmoqchi”.

Deputat AQSH bu maqsadlarda Kolumbiyadagi harbiy bazalaridan foydalanishi mumkinligi va Maduroning qayerda ekanligi haqidagi maʼlumot uchun avval eʼlon qilingan mukofot aslida “yollanma askarlarni chaqirish” ekanligini taʼkidladi.