Foto: Prezident matbuot xizmati

Yoshlarimizda vatanparvarlik ruhini kuchaytirish boʻyicha 10-11-sinf oʻquvchilari oʻrtasida boshlangan “Vatan tayanchi” harakati kasb-hunar maktabi, texnikum va xususiy taʼlim tashkilotlarida ham yoʻlga qoʻyilishi belgilandi. Bu haqda Prezidentning yoshlar bilan muloqotida maʼlum qilindi.

“Vatan tayanchi” otryadlari oʻrtasida “maktab – tuman – viloyat – respublika” darajasida sport musobaqalari va ijodiy tanlovlar tashkil etiladi.

Shu kabi har bir mahallada yoshlar oʻrtasida “mahalla – sektor – tuman – viloyat – respublika” darajasida “Shijoat va gʻayrat” sport oʻyinlari oʻtkaziladi. Gʻolib mahallalarga sport inshooti qurib beriladi, zarur anjomlar bilan taʼminlanadi.

“Vatan tayanchi” hamda “Shijoat va gʻayrat” musobaqalari gʻoliblariga harbiy oliygohlarga kirishi uchun tavsiya beriladi.

Yoshlar masalasi parlament va mahalliy Kengash deputatlari faoliyatida ham muhim yoʻnalish sifatida qaralishi lozimligi taʼkidlandi.

Yoshlarga daxldor qonun loyihalarini Yoshlar parlamenti aʼzolari bilan birga muhokama qilish va yalpi majlisda loyiha boʻyicha yoshlar vakillarining fikrini ham eshitish maqsadga muvofiq ekani koʻrsatib oʻtildi.

Shuningdek, mahalliy kengash sessiyalarida yoshlar masalalari boʻyicha masʼul organlar rahbarlarining axborotini eshitish, barcha mahalliy kengashlar huzurida yoshlar guruhlarini tashkil etish tashabbuslari ilgari surildi.

Mahallalarda yoshlar yetakchilari tizimi yoʻlga qoʻyilganidan keyin yoshlar siyosati tubdan oʻzgarib, mutlaqo yangi bosqichga koʻtarilgani eʼtirof qilindi.

Lavozimga kirishayotgan yoshlar yetakchilarining kasbiy koʻnikmalarini shakllantirish maqsadida ularni tizimli ravishda oʻqitishni yoʻlga qoʻyish zarurligi qayd etildi.