Illyustrativ foto

Samarqand viloyati Urgut tumanidagi maktablardan birining direktori va uning sherigi katta miqdordagi giyohvandlik moddasi savdosi ustida ushlandi. «Xalq soʻzi»da ularga nisbatan chiqarilgan sud hukmi nusxasi mavjud.

Hujjatda keltirilishicha, Urgut tumanidagi 71-umumtaʼlim maktabi direktori lavozimida ishlagan F.X. 2024-yilning avgust oyi boshlarida mahalladoshi Sh.A. bilan koʻp miqdordagi “opiy” giyohvandlik moddasini Samarqand viloyati hududida sotish boʻyicha jinoiy til biriktirgan. Shundan soʻng, Sh.A. tergovda shaxsini aniqlash imkoni boʻlmagan shaxsdan 1 kg opiyni pulini sotganidan soʻng berish sharti bilan olgan.

Jinoiy sheriklar 2024-yil 27-noyabr kuni giyohvand moddani xaridor (huquqni muhofaza qiluvchi organ xodimlari tomonidan tezkor tadbirga jalb qilingan shartli xaridor)ga 12 ming AQSh dollariga sotmoqchi boʻlgan vaqtida ashyoviy dalillar bilan ushlangan. Ulardan bir dona qora rangli sellofan paketga oʻralgan 921,36 gramm ogʻirlikdagi opiy giyohvand moddasi ashyoviy dalil sifatida olingan.

Joriy yilning 28-mart kuni jinoyat ishlari boʻyicha Urgut tuman sudida maktab direktori va uning sherigiga nisbatan ish koʻrib chiqilgan. F.X. sudda aybiga qisman iqrorlik bildirgan hamda “opiy”ning tuman Maktabgacha va maktab taʼlimi boʻlimida ishlovchi tanishining iltimosiga asosan topib berganligini, bundan manfaatdor boʻlmaganini aytib, suddan yengillik soʻragan.

Sh.A. ham aybiga qisman iqror boʻlib, F.X. turmush oʻrtogʻini ishga qabul qilishini aytgani uchun uning iltimosiga rozi boʻlib, giyohvand modda topib berganini maʼlum qilgan.

Sud hukmi bilan F.X. va Sh.A. Jinoyat kodeksining 25,273-moddasi 5-qismida (Giyohvandlik vositalari, ularning analoglari yoki psixotrop moddalarni koʻp miqdorda qonunga xilof ravishda sotish) nazarda tutilgan jinoyatni sodir etganlikda aybli deb topilgan. Shunga asosan F.X.ga nisbatan 10-yil 2 oy, Sh.A.ga esa 11-yil muddatga ozodlikdan mahrum qilish jazosi tayinlangan.