Sovuq kunlar boshlangani tufayli sabzavotlarni sovuq urishi ehtimoli yuqori. Sanepidqoʻmita bunday mahsulotlarni isteʼmol qilishning salomatlikka taʼsiri haqida maʼlumot berdi.

Unda aytilishicha, har bir oziq-ovqat mahsulotini texnik jihatdan tartibga solishning muayyan talablari belgilangan. Yaʼni, har bir mahsulot qoida va normalarda belgilangan maʼlum harorat va havoning nisbiy namligida saqlanishi lozim boʻladi.

Sovuq tushishi natijasida bozordagi ayrim sabzavot va meva mahsulotlarini sovuq urishi ehtimoli yuqori. Bunda mahsulotlar oʻzining organoleptik xususiyatlari – mazasi va taʼmini yoʻqotadi. Bu esa sabzavotni isteʼmolga yaroqsiz holatga keltiradi. Bundan tashqari, ushbu mahsulotlarning ozuqaviy qiymati ham pasayadi.

“Ular zaharlanishlarga olib kelmaydi, lekin barcha foydali xususiyatlarini yoʻqotadi va ularning saqlash muddati muz tushgandan keyin keskin kamayib ketadi”, — deyiladi qoʻmita xabarida.

Maʼlumot uchun, “Umumiy ovqatlanish korxonalariga qoʻyiladigan sanitariya-gigiyena talablari” 0027-22-son SanQvaMning 79-bandida ham korxonalarda muzdan eritilgan va qayta muzlatilgan oziq-ovqat mahsulotlari oziq-ovqat xom ashyosi va mahsulotlarini qabul qilishga ruxsat etilmagan.