“Axios” nashrining xabar berishicha, AQSH Davlat departamenti hukumatdagi “shatdaun” tufayli qiymati 5 milliard dollardan ortiq boʻlgan qurol bitimlarini muzlatishga majbur boʻlgan. Yetkazib berish jarayonining toʻxtab qolishi Ukrainaga koʻrsatilayotgan harbiy yordamga sezilarli taʼsir koʻrsatishi mumkin.

“Bu nafaqat bizning ittifoqchilarimiz va hamkorlarimizga, balki koʻplab muhim harbiy tizimlarni xorijga yetkazib berishi lozim boʻlgan Amerika mudofaa sanoatiga ham zarar yetkazmoqda”, — dedi Davlat departamentining yuqori lavozimli rasmiysi “Axios”ga bergan intervyusida.

Maʼlum qilinishicha, kechikishlar AMRAAM “havo-havo” raketalari, Daniya, Xorvatiya va Polsha uchun moʻljallangan “Aegis” raketa tizimlari hamda HIMARS RQZO (reaktiv zalp otish tizimi)larining yetkazib berishiga taalluqlidir. Yetkazib berishning yakuniy muddati hozircha nomaʼlum.

AQSHning NATOdagi ittifoqchilari bilan tuzayotgan bunday bitimlar, asosan, Ukrainani qoʻllab-quvvatlash maqsadida amalga oshiriladi.

Kechikishning bosh sababi — qonunchilik jarayonlari va xodimlar yetishmovchiligi. Qurol-aslahani eksport qilishni nazorat qilish toʻgʻrisidagi qonunga koʻra, bunday bitimlar Kongress tomonidan koʻrib chiqilishi shart. Biroq Kongress qoʻmitalarini xabardor qilish va protseduralarni yakunlash uchun masʼul boʻlgan Davlat departamentining koʻplab xodimlari majburiy taʼtilga chiqarilgan.