Foto: FOTODOM

“Uber” oʻz ilovasi orqali Dubayda havo taksisiga buyurtma berish imkoniyatini eʼlon qildi. Bu haqda kompaniya veb-saytida maʼlum qilindi.

Havo taksisini yoʻlga qoʻyish uchun “Uber” Dubayda ushbu xizmatni ishga tushirishni rejalashtirayotgan “Joby Aviation” kompaniyasi bilan hamkorlik qildi.

Taksilar toʻrttagacha yoʻlovchini sigʻdira oladi va tijorat uchuvchilari tomonidan boshqariladi. Buning uchun Dubayda toʻrtta qoʻnish maydonchasini tashkil etish rejalashtirilgan. Ular shahardagi xalqaro aeroport, savdo markazi, “Palm Jumeirah” orolidagi mehmonxona va Dubay Amerika universitetida joylashtiradi.

“Uber” va “Joby Aviation” kelajakda Nyu-York, Los-Anjeles, Buyuk Britaniya va Yaponiyada havo taksi xizmatlarini ishga tushirishni rejalashtirmoqda. Qayd etilishicha, AQSH shaharlarida ushbu rejani amalga oshirish uchun kompaniyalar sertifikat olishlari va AQSH Federal aviatsiya maʼmuriyatida sinovdan oʻtishlari kerak.

Avvalroq, Yaponiyaning “SkyDrive” kompaniyasi tomonidan ishlab chiqilgan uchar avtomobilning birinchi sinov parvozi Tokioda boʻlib oʻtgandi.