Bosh prokuratura huzuridagi departamentning Chust, Sherobod tumani hamda Samarqand shahri boʻlimi tomonidan tezkor tadbirlar oʻtkazildi, deb xabar bermoqda Iqtisodiy jinoyatlarga qarshi kurashish departamenti.

Xabarda aytilishicha, oʻtkazilgan tezkor tadbir davomida fuqaro M.R. fuqaro N.Yu.dan 4 ming AQSH dollarini 50,8 million soʻmga sotib olgan vaqtida ashyoviy dalillar bilan qoʻlga olingan.

Shu kabi yana bir holat departamentning Sherobod tumani boʻlimi tomonidan oʻtkazilgan tezkor tadbirda ham aniqlangan.

Unga koʻra, fuqaro M.H. fuqaro A.D.ga 3 ming 900 AQSH dollarini 330 ming Rossiya rubliga sotgan vaqtida ashyoviy dalillar bilan ushlangan.

Shuningdek, departamentning Samarqand shahri boʻlimi tomonidan oʻtkazilgan tezkor tadbirda fuqaro Z.K. fuqaro N.T.ga 2 ming 300 AQSH dollari va 90 ming Rossiya rublini 44 million soʻmga sotgan vaqtida ashyoviy dalillar bilan qoʻlga tushgan.

Hozirda mazkur holatlar yuzasidan Jinoyat kodeksining 177-moddasi (valyuta qimmatliklarini qonunga xilof ravishda olish yoki oʻtkazish) bilan jinoyat ishlari qoʻzgʻatilib, tergov harakatlari boshlab yuborilgan.