Energiya resurslaridan noqonuniy foydalanish holatlari fosh qilindi, deb xabar bermoqda Iqtisodiy jinoyatlarga qarshi kurashish departamenti.

Unda aytilishicha, Bosh prokuratura huzuridagi departamentning Jarqoʻrgʻon tumani boʻlimi xodimlari tomonidan oʻtkazilgan tergovga qadar tekshiruvda fuqaro D.M. “Yangiobod” MFY hududidagi xonadonida tijorat maqsadida umumiy foydalanishdagi gaz tarmogʻiga oʻzboshimchalik bilan ulanib, 199,8 million soʻmlik tabiiy gazdan noqonuniy foydalangani fosh qilingan.

Shu kabi yana bir holat, departamentning Sirdaryo viloyati boshqarmasi xodimlari tomonidan oʻtkazilgan tergovga qadar tekshiruvda ham aniqlangan.

Unga koʻra, “N.B.” fermer xoʻjaligi masʼul shaxslari tijorat maqsadida suv nasosini umumiy foydalanishdagi elektr tarmogʻiga oʻzboshimchalik bilan toʻgʻridan-toʻgʻri ulab, 136,1 million soʻmlik elektr energiyasidan noqonuniy foydalanganligi aniqlangan.

Bundan tashqari, departamentning Urganch tumani boʻlimi xodimlari tomonidan oʻtkazilgan tergovga qadar tekshiruvda fuqaro S.A. “Yangiobod” MFY hududidagi binoda umumiy foydalanishdagi tabiiy gaz tarmogʻiga oʻzboshimchalik bilan ulanib, 115,6 million soʻmlik tabiiy gazdan noqonuniy foydalangani maʼlum boʻlgan.

Hozirda mazkur holatlar yuzasidan Jinoyat kodeksining tegishli moddalari bilan jinoyat ishlari qoʻzgʻatilib, tergov harakatlari boshlab yuborilgan.