Foto: OʻFA

Bugun, 19-fevral kuni Xitoyning Shinjen shahrida futbol boʻyicha 20 yoshgacha boʻlgan futbolchilar oʻrtasida Osiyo kubogi guruh bosqichining soʻnggi tur oʻyinlari boʻlib oʻtdi. Unda Oʻzbekiston terma jamoasi eronlik futbolchilarga qarshi saf tortdi.

Oʻyinning birinchi boʻlimida hisob ochilmadi. Ikkinchi boʻlim teng kurashlar ostida boshlangan boʻlsada, 51-daqiqaga kelib futbolchilarimizning xatosidan unumli foydalangan raqiblar hisobni ochishga muvaffaq boʻlishdi. 66-daqiqaga kelib darvozamiz tomon penalti belgilandi hamda eronliklar hisobni 0:2 koʻrinishiga keltirishdi.

Shundan soʻng, zaxiradan maydonga tushirilgan Muhammadali Oʻrinboyev oʻzining dastlabki urinishidayoq Eron darvozasini ishgʻol etib, hisobni qisqartirdi.

Qolgan vaqt hamyurtlarimiz ustunligida oʻtgan boʻlsada, futbolchilarimiz raqiblar darvozasiga yoʻl topa olishmadi. Oʻyin 1:2 hisobida Eron terma jamoasi gʻalabasi bilan yakunlandi.

Shu tariqa, Eron terma jamoasi 9 ochko bilan “C” guruhining birinchi pogʻonasini egallagan boʻlsa, Oʻzbekiston terma jamoasi 6 ochko bilan ikkinchi oʻrinda chorak finaliga yoʻl oladigan boʻldi.

Endi vakillarimiz “D” guruhida birinchi oʻrinni egallagan jamoa bilan chorak finalda toʻqnash kelishadi. Bu katta ehtimol bilan Yaponiya yoki Janubiy Koreya terma jamoasi boʻladi.