Tojikistonda sodir boʻlgan ogʻir va mudhish yoʻl-transport hodisasi ikki nafar Oʻzbekiston fuqarosining hayotiga zomin boʻldi. Yirik toʻqnashuv natijasida jami yetti kishi halok boʻlgan. Bu haqda Tojikiston Favqulodda vaziyatlar vazirligi xabar qildi.

Qayd etilishicha, Oʻzbekiston fuqarosi boshqaruvidagi “Volkswagen” rusumli avtomashina Dushanbe—Xoʻjand—Chanoq avtomagistralining Dadaboy Xolmatov qishlogʻidan oʻtgan 332,2-kilometrida “Toyota” va “Mercedes-Benz” avtomobillariga toʻqnashib ketgan.

Avtohalokat oqibatida “Volkswagen”ni boshqargan oʻzbekistonlik haydovchi va uning yoʻlovchisi ogʻir tan jarohatlari olib, hodisa joyida halok boʻlgan. Shuningdek, “Mercedes-Benz” haydovchisi hamda uning salonida boʻlgan toʻrt nafar yoʻlovchi, jumladan ikki nafar yosh bola ham vafot etishgan.

Jami halok boʻlganlar soni yetti nafarni tashkil qildi, qolgan yoʻlovchilar ogʻir tan jarohatlari bilan shifoxonaga yotqizilgan. Ularga tibbiy yordam koʻrsatilmoqda va ahvollari nazorat ostida.

Hozirda Tojikiston Respublikasi huquq-tartibot organlari tomonidan hodisa yuzasidan jinoyat ishi qoʻzgʻatilgan. Voqea sabablari, texnik holatlar, haydovchilarning harakat tezligi va ehtimoliy qoidalar buzilishi yuzasidan surishtiruv ishlari olib borilmoqda. Ayniqsa, “Volkswagen” haydovchisining qanday sharoitda boshqaruvni yoʻqotgani alohida oʻrganilmoqda.

Jamoatchilikka maʼlum qilinishicha, voqea boʻyicha barcha tergov ishlari yakunlangach, toʻliq rasmiy maʼlumot eʼlon qilinadi. Hozircha esa halok boʻlganlar oilalariga sabr-toqat va tasalli tilashdan oʻzga chora yoʻq.