Fargʻona viloyatida tozalikni taʼminlash, aholi sogʻlom muhitda yashashi, hududlarni yashil va obod maskanga aylantirish, doimo toza va qulay muhit yaratish hamda ekologik barqarorlikni mustahkamlash borasida keng koʻlamli saʼy-harakatlar olib borilmoqda.

Ayni jarayondagi tizimli ishlar davomida Fargʻona viloyati sogʻliqni saqlash boshqarmasi hamda Oʻzbekiston kasaba uyushmalari Federatsiyasining Fargʻona viloyati Kengashi hamkorligida Fargʻona shahar obodonlashtirish boshqarmasi ishchi-xodimlari bepul tibbiy koʻrikdan oʻtkazildi.

Viloyat teatr-konsert saroyida tashkil etilgan tibbiy koʻrikda xodimlar kardiolog, nevropatolog, urolog, pulmonolog, ginekolog, terapevt, endokrinolog, EKG, dermatolog singari tor doiradagi shifokorlar koʻrigidan oʻtdi.

—Biz haqimizda oʻylab, gʻamxoʻrlik koʻrsatadigan, salomatligimiz haqida qaygʻuradiganlar borligidan xursandmiz, — deydi Fargʻona shahar obodonlashtirish boshqarmasi ishchisi Shoiraxon Abdurahmonova.—Bugun kasaba uyushmalari tomonidan uyushtirilgan bepul tibbiy koʻrikda shifokorlar nazoratidan oʻtdik.

Tadbir doirasida ishchi-xodimlar bilan muloqotlar ham oʻtkazilib, kasalliklar profilaktikasi, sogʻlom turmush tarzini targʻib etish boʻyicha maʼlumotlar berildi.

Tibbiy koʻrik davomida davolanishga moyilligi bor shaxslar kasaba uyushmalari tomonidan sihatgohlarda imtiyozli ravishda davolanishi belgilab olindi.

Shohsulton TOʻXTAMATOV,

Oʻzbekiston kasaba uyushmalari Federatsiyasining

Fargʻona viloyati Kengashi raisi maslaxatchisi.