“Uzbekistan Airways” ning Malayziyaga uchgan reysida oʻgʻrilikka urinish sodir boʻldi. Bu haqda aviakompaniya matbuot xizmati xabar berdi.

Qayd etilishicha, joriy yilning 15-avgust Toshkent-Kuala-Lumpur yoʻnalishi boʻyicha amalga oshirilgan aviaqatnovda yoʻlovchilarning qimmatbaho buyumlari oʻgʻirlangan. Samolyot Malayziyaga yetib kelgach, politsiya chaqirilgan.

Ekipaj huquqni muhofaza qilish organlari vakillari bilan birgalikda havo kemasini koʻzdan kechirish boʻyicha tegishli protseduralarni amalga oshirgan va jarayonda barcha buyumlar topilgan. Gumon qilingan chet el fuqarolari esa shu joyning oʻzida ushlanib, politsiya xizmatiga olib ketilgan.

“Uzbekistan Airways”ning taʼkidlashicha, bunga oʻxshash holatlar koʻplab aviakompaniyalar bilan sodir boʻladi.

“Kompaniya ham bunday hodisalarga qarshi qattiq kurashni qoʻllab-quvvatlaydi va ushbu yoʻnalishda huquqni muhofaza qilish organlari va belgilangan mamlakatlarning migratsiya xizmatlari bilan birgalikda ish olib bormoqda”, deyiladi xabarda.

Aviakompaniya shuningdek, yoʻlovchilarning qoʻl yuki uchun javobgar emasligini eslatgan. Yoʻlovchilar qimmatbaho buyumlari va pul mablagʻlarini oʻzida saqlashi, qoʻl yuklarni oʻrindigʻi tepasiga yoki ostiga joylashtirishi kerakligi qayd etilgan.