Illyustrativ foto

Toshkentdagi “Muhteshem Doner” restoranida ommaviy zaharlanish yuz berdi, 23 nafar jabrlanuvchilar shifoxonaga yotqizilgan. Bu haqda “Kun.uz” xabar berdi.

Maʼlum qilinishicha, joriy yilning 5-6-7-sentyabr kunlari ovqatdan zaharlanish belgilari bilan jami 23 nafar shaxs (22 nafari Epidemiologiya, mikrobiologiya, yuqumli va parazitar kasalliklar ilmiy-amaliy tibbiyot markazi klinikasiga hamda 1 nafari Toshkent shahar 4-son yuqumli kasalliklar shifoxonasiga) murojaat qilgan.

Aniqlanishicha, ularning barchasi 2024-yilning 5-sentyabr kuni “Muhteshem Doner” kafesida ovqatlangan. Olib borilgan davolash muolajalari natijasida bemorlarning ahvoli yaxshilangan va 11-sentyabr kuni soat 18:00 holatiga koʻra ularning 11 nafariga uylariga ruxsat berilgan.

“Qolgan bemorlar davolash muolajalarini olishmoqda va kasallik dinamikasida ijobiy oʻzgarishlar kuzatilmoqda. Bir-ikki kun ichida qolgan bemorlarga ham uylariga ruxsat berish rejalashtirilmoqda. Jabrlanganlar orasida kafe xodimlari ham bor.

Hozirda mazkur kafe faoliyati vaqtincha toʻxtatilgan, isteʼmol qilingan oziq-ovqat mahsulotlari qoldiqlaridan namunalar olinib, laboratoriya tekshiruvlari davom ettirilmoqda

Birlamchi epidemiologik surishtiruv natijalariga koʻra zaharlanishga kafeda tayyorlangan sous (bemorlarning barchasi isteʼmol qilgan mahsulot) sabab boʻlgan boʻlishi mumkin degan xulosaga kelinmoqda”, deya vaziyatga izoh bergan Respublika Sanitariya-epidemiologik osoyishtalik va jamoat salomatligi qoʻmitasi raisi birinchi oʻrinbosari Nurmat Otabekov.

Bosh prokuratura axborot xizmati rahbari Hayot Shamsuddinovga koʻra, hozirgi vaqtda holat yuzasidan surishtiruv ishlari boshlangan.