Toshkentda “zakladka” usulida giyohvandlik moddalarini tarqatayotgan shaxslar qoʻlga olindi. Bu haqda IIV Matbuot xizmati xabar qildi.

Qayd etilishicha, joriy yilning 19-iyul kuni Toshkent shahar Uchtepa tumanida Chilonzor tumanidagi tungi klub qoʻriqchisi 1997-yilda tugʻilgan shaxs toʻxtatilib tekshirilganda, uning yonidan 37 dona oʻramda 26 gramm mifidron giyohvandlik moddasi borligi aniqlandi.

Shuningdek, tadbir davomida ushbu shaxs tomonidan tumanda joylashgan koʻpqavatli uylardan birining kirish yoʻlagiga “zakladka” usulida yashirilgan 11 gramm hamda uning boshqaruvidagi Lacetti avtomashina salonida 3 gramm mifidron giyohvandlik moddasi borligi aniqlanib, ashyoviy dalillar hujjatlashtirilib olingan. Oʻtkazilgan tezkor qidiruv tadbirlari natijasida jami 40 gramm mifidron moddasi olingan.

Shu kabi boshqa bir holatda esa joriy yilning 21-iyul kuni Toshkent shahar Yunusobod tumanida 2004-yilda tugʻilgan fuqaro toʻxtatilib tekshirilganda uning yonidan 30 dona oʻramda 60 gramm giyohvandlik moddasi borligi aniqlanib, ashyoviy dalil sifatida olingan.

Hozirda tezkor qidiruv tadbirlari davom ettirilmoqda.

Avvalroq Toshkent viloyatining Oʻrta Chirchiq tumanida internet orqali giyohvandlik vositalarini sotuvchi shaxslar bilan aloqada boʻlib, “zakladchik” sifatida faoliyat yuritgan 3 nafar shaxs qoʻlga olingani toʻgʻrisida xabar qilgandik.