Foto: Davronbek Ernazarov / «Xalq so‘zi»

2025-yil 1-may kuni Toshkent shahrida Demokratik jarayonlarni tahlil qilish markazi tashabbusi bilan “Yangi O‘zbekistonda qadriyatlar transformatsiyasi” mavzusida xalqaro konferensiya tashkil etildi. Anjumanda 9 ta xorijiy davlatdan ekspertlar, davlat idoralari, fuqarolik jamiyati institutlari, akademik hamjamiyat va siyosiy partiyalar vakillari — jami 70 nafarga yaqin mahalliy va xalqaro mutaxassislar ishtirok etdi.

Konferensiyada so‘nggi yillarda O‘zbekistonda amalga oshirilayotgan ijtimoiy, madaniy va ma’naviy islohotlar tahlil qilinib, milliy qadriyatlar transformatsiyasi, ularni asrab-avaylash va kelajak avlodga yetkazish masalalari muhokama etildi. Xalqaro ekspertlar milliy qadriyatlarni saqlagan holda globallashuvga moslashish muhimligi va O‘zbekistonda bu yo‘nalishdagi ishlar samarali yo‘lga qo‘yilganini ta’kidlashdi.

Anjumanda fuqarolik jamiyatini rivojlantirish, yoshlarning ma’naviy kamolotini ta’minlash, kitobxonlik va milliy merosni targ‘ib qilish, oila institutini mustahkamlashga qaratilgan tashabbuslar alohida e’tirof etildi.

Ekspertlar “O‘zbekiston – 2030” strategiyasi doirasidagi islohotlarni yuqori baholab, mamlakatni barqaror va inklyuziv taraqqiyot sari yetaklovchi muhim qadamlar sifatida qayd etdilar. Konferensiya yakunida milliy qadriyatlarni saqlash va demokratik jamiyatni mustahkamlash bo‘yicha bir qator taklif va tavsiyalar bildirildi.

Foto: Davronbek Ernazarov / «Xalq so‘zi»