Oʻzbekiston raisligida Prezident huzuridagi Strategik va mintaqalararo tadqiqotlar instituti tomonidan Shanxay hamkorlik tashkiloti forumining XIX yigʻilishi 5-iyun kuni Toshkent shahrida oʻtkaziladi. Bu haqda Tashqi ishlar vazirligining «Dunyo» axborot agentligi maʼlum qildi.

Agentlik xabariga koʻra, forum «Yangi sharoitlarda SHHTning roli: umumiy xavfsizlik, barqarorlik va farovonlik yoʻlidagi saʼy-harakatlarni birlashtirish» mavzusi ostida oʻtkaziladi.

Yuqori darajali tadbirda dunyoning 10 mamlakatidan 40 dan ziyod ekspertlar, jumladan, SHHTga aʼzo davlatlar milliy tadqiqot markazlarining vakillik delegatsiyasi, SHHTda kuzatuvchi davlatlar va tashkilotlarning muloqot boʻyicha hamkorlari mutaxassislari, SHHT Kotibiyati rahbariyati va SHHT Mintaqaviy aksilterror tuzilmasi Ijroiya qoʻmitasi rahbariyati ishtirok etishi kutilmoqda.

Tadbir kun tartibi SHHT doirasidagi hamkorlikning ustuvor yoʻnalishlariga bagʻishlangan uchta — asosiy sessiya, zamonaviy rivojlanish bosqichida SHHT samaradorligini oshirish va SHHT forumi faoliyatini takomillashtirish istiqbollari muhokamasini oʻz ichiga oladi.