Foto: Videodan kadr

Toshkent viloyati Boʻstonliq tumanida 4 milliard 800 million soʻmlik sintetik giyohvandlik vositalarini tarqatish maqsadida olib ketayotgan shaxs ushlandi. Bu haqda viloyat IIBB axborot xizmati xabar berdi.

Manbaga koʻra, nazorat tadbiri davomida 33 yoshli fuqaro M.I. Toshkent viloyatining Boʻstonliq tumani hududida gumonlanib tekshirilgan. Uning yonida boʻlgan avtomobil ehtiyot qismi (reduktor) koʻzdan kechirilganda, ehtiyot qism ichiga joylashtirilgan 12 ta oʻramdagi, (“qora bozor”dagi taxminiy narxi 4 milliard 800 million soʻmga teng) boʻlgan, ekspertiza xulosasiga koʻra, 6 kilogramm sintetik giyohvandlik vositasi borligi aniqlangan va daliliy ashyo sifatida olingan.

Ushlangan shaxsning yashash xonadoni tekshirilganida, sintetik vositalarni kichik miqdorga ajratib, qadoqlash va tarqatish uchun kerakli vositalar borligi maʼlum boʻlgan.

Holat yuzasidan Jinoyat kodeksi 273 moddasi (giyohvandlik vositalari, ularning analoglari yoki psixotrop moddalarni oʻtkazish maqsadini koʻzlab qonunga xilof ravishda tayyorlash, olish, saqlash va boshqa harakatlar qilish, shuningdek, ularni qonunga xilof ravishda oʻtkazish) 5-qismi bilan jinoyat ishi qoʻzgʻatilgan. Tergov harakatlari olib borilmoqda.

Dastlabki surishtiruvga koʻra, unga ushbu sintetik giyohvandlik vositalari tegishli Telegram-bot yordamida Qirgʻizistondan vodiy viloyatlari orqali yetkazib berilgani aniqlangan. Hozirda ushbu sintetik giyohvandlik vositalarining manbasini aniqlash boʻyicha tezkor qidiruv tadbirlari davom ettirilmoqda.