Illyustrativ foto

Toshkent viloyatida katta yoshli erkak 5 yashar qizchaga tegajogʻlik qilgani aytilmoqda. Bu haqda “Sukut saqlama” loyihasi jabrlanuvchi qizning onasiga tayanib, xabar berdi.

Qayd etilishicha, voqea joriy yilning 11-iyun kuni kechki soat 19:00 larda sodir boʻlgan.

“Oʻsha paytda qorongʻi tusha boshlagan edi, qizcham katta opasi bilan roʻparada yashaydigan bolalar bilan oʻynashga ketdi. Mahallada hammamiz bir-birimizni yaxshi bilamiz, shuning uchun hovlining darvozalari deyarli doim ochiq.

Taxminan 19:00 larda men bolalarni uyga chaqirishga chiqdim. Darvozaga yaqinlashib, hovliga yugurib kirayotgan qizimni koʻrdim. U yigʻlab, Shavkat ismli yoshi katta odam uni quchoqlab, shilqimlik qilganini qayta-qayta takrorladi. Avvaliga men hayratda qoldim va u aynan nima qilganini soʻray boshladim. Eshitganlarim meni shokka tushirdi”, degan qizaloqning onasi “Sukut saqlama” loyihasiga yoʻllagan murojaatida.

Uning qoʻshimcha qilishicha, qoʻshni erkakning oldiga vaziyatga oydinlik kiritish maqsadida borganida u mast boʻlgan. Shuningdek, erkak yuqorida aytilgan hamma narsani rad etgan va qizchani erkalash maʼnosida oʻpganini, bola esa uni tamoman notoʻgʻri tushunganini aytgan.

“U bilan gaplashishdan foyda yoʻqligini tushunib, erim bilan ichki ishlar boʻlimiga bordim. Ular mahalla nozirini chaqirishdi, men ariza yozmoqchi edim, lekin u arizani qabul qilmadi. Men shok holatida edim, erim bu qoʻshniga nisbatan nimadir qilib qoʻyishidan qoʻrqdim.

Stress tufayli nima qilishni bilmay qoldim. Mahalla noziri arizani bari bir qabul qilmadi. Shundan soʻng men shahar prokuraturasiga ariza yozdim. Ariza topshirilganiga 6 kun boʻldi. Lekin bu odam hali ham ozodlikda yuribdi. U koʻchada bizning uyimiz yonidan oʻtadi (bu qoʻshnining uyi biznikiga yaqin). Endi hovlimizning eshigini ochishga, uydan chiqishga qoʻrqyapman. Men qizlarimdan xavotirdaman”, deyiladi murojaatda.

Mazkur xabar ijtimoiy tarmoqlarda keng tarqalganidan soʻng Bosh prokuratura holat nazoratga olinganini hamda 5 yoshli qizchaga shilqimlik qilgan erkakka nisbatan Jinoyat kodeksining 129-moddasi (oʻn olti yoshga toʻlmagan shaxsga nisbatan uyatsiz-buzuq harakatlar qilish) bilan jinoyat ishi qoʻzgʻatilganini maʼlum qildi.

Prokuraturaga koʻra, shuningdek, Nurafshon IIB profilaktika inspektori xatti-harakatlariga huquqiy baho berish maqsadida xizmat tekshiruvi tayinlangan.

Bundan tashqari “Daryo” nashri Bolalar ombudsmaniga tayanib, xabar berishicha, holat yuzasidan olib borilayotgan tergovga qadar tekshiruv doirasida bolaga nisbatan sudga oid tibbiyot ekspertizasi tayinlangan.