Toshkent shahrida Oʻzbekiston Respublikasining Shanxay hamkorlik tashkilotiga raisligi doirasida II Iqtisodiy forum boʻlib oʻtadi

17:03 10 Avgust 2022 Siyosat
525 0

Foto: Illustrativ foto

Joriy yilning 16-17-avgust kunlari Toshkent shahrida Oʻzbekiston Respublikasining Shanxay hamkorlik tashkilotiga raisligi doirasida II Iqtisodiy forum boʻlib oʻtadi.

2021-yil iyun oyida Dushanbe shahrida (Tojikiston) birinchi marta oʻtkazilgan forum tashkilot doirasidagi sheriklik munosabatlarini rivojlantirish va yanada mustahkamlashga xizmat qiluvchi samarali muloqot maydoni sifatida oʻzini namoyon qildi.

Tadbirdan koʻzlangan asosiy maqsad tomonlar eʼtiborini oʻzaro manfaatli savdo-iqtisodiy, sarmoyaviy va madaniy-gumanitar hamkorlikni rivojlantirish muammolari va istiqbollariga qaratish, SHHT makonida aloqalarni mustahkamlash boʻyicha samarali chora-tadbirlar ishlab chiqishdan iborat.

Yalpi majlis, panel sessiyalari, ikki tomonlama uchrashuvlar, b2b aloqalar – Forumning boy kun tartibi raqamli iqtisodiyot, yashil texnologiyalar, hududlar oʻrtasidagi hamkorlik, sarmoyaviy kooperatsiyani rivojlantirish, sanoat kooperatsiyasi va sheriklikning boshqa ustuvor yoʻnalishlari salohiyatini ochishga qaratilgan.

SHHT Iqtisodiy forumi nafaqat hukumatlararo muloqotni yoʻlga qoʻyish, balki ishbilarmon doiralar va korxonalar vakillarining oʻzaro hamkorligi, shuningdek, SHHT makonidagi hududlarga investorlarni jalb qilish uchun samarali maydonga aylanishi koʻzda tutilgan.

Tavsiya etamiz

Izohlar

Hozircha hech kim fikr bildirmagan. Balki Siz birinchilardan bo'larsiz?