Oʻzbekiston poytaxti 7-Xalqaro yoga konferensiyasiga mezbonlik qildi. Bu tadbir Markaziy Osiyoda birinchi marta oʻtkazildi. “Bir zamin, bir salomatlik uchun yoga” shiori ostida tashkil etilgan ikki kunlik konferensiya Hindiston Madaniy Aloqalar Kengashi (ICCR), Hindistonning Toshkentdagi elchixonasi va Oʻzbekiston Yoga Federatsiyasi tomonidan tashkil etildi.

Ochilish marosimida Oʻzbekiston Yoga Federatsiyasi raisi Jahongir Ortiqxoʻjayev, Oʻzbekiston Sport vazirligi maslahatchisi Sharifjon Moʻminjonov, Hindistonning Oʻzbekistondagi elchisi Smita Pant, ICCR Bosh direktori oʻrinbosari Abxay Kumar va Hindistonning Ayush vazirligi vakillari ishtirok etdi.

Elchi Smita Pant oʻz kirish soʻzida Oʻzbekistonda yogaga boʻlgan qiziqish ortib borayotganini taʼkidlab, uning mamlakat yoshlari orasida tobora ommalashib borayotganini qayd etdi. U Hindistonning mintaqada salohiyatni oshirish va oʻqituvchilar tayyorlash boʻyicha oʻz majburiyatlarini yana bir bor tasdiqladi.

ICCR Bosh direktori oʻrinbosari Abxay Kumar konferensiyaning Markaziy Osiyoda oʻtkazilishi muhimligini taʼkidladi. “ICCR birinchi marta ushbu mintaqada bunday keng koʻlamli xalqaro yoga konferensiyasini tashkil qilmoqda. Yevrosiyodagi 10 ta davlat vakillarining ishtiroki bilan ushbu tadbir yogani yangi chegaralarga olib chiqish va yosh avlodlar orasida yanada ommalashtirish yoʻlidagi muhim qadam boʻldi”, - dedi Kmar janoblari.

Asosiy maʼruzachi, taniqli yoga eksperti Shri M “Yoga va ong” mavzusida qilgan chiqishida yoganing chuqur maʼnaviy oʻlchamlariga eʼtibor qaratdi. “Yoga - ong yoki sanskrit tilida chetna deb ataladigan koʻp oʻlchovli mavjudotni oʻrganish uchun eng yaxshi vosita”, - deb tushuntirdi u va yoga nafaqat jismoniy farovonlikni, balki oʻzini anglash va ruhiy tiniqlikka olib boradigan yoʻlni ham taklif qilishini taʼkidladi.

Uning fikrlari keyingi muhokamalar uchun ohang bagʻishladi va yogani tana, ong va ruhni birlashtiradigan, shu bilan birga zamonaviy salomatlik muammolarini hal qiladigan yaxlit fan sifatida talqin etdi.

Ikki kunlik tadbirda 10 mamlakatdan, jumladan Hindiston, Oʻzbekiston, Qozogʻiston, Qirgʻiziston, Tojikiston, Turkmaniston, Gruziya, Armaniston, Moʻgʻuliston va Rossiyadan vakillar ishtirok etdi. Ularning ishtiroki yoganing Janubiy Osiyodan tashqariga chiqib, turli madaniyatlar oʻrtasida birlashtiruvchi amaliyot sifatida qabul qilinishini aks ettiradi.

Xalqaro yoga konferensiyasi ICCRning yillik ravishda turli global shaharlarda oʻtkaziladigan va amaliyotni butun dunyo boʻylab targʻib qilishga qaratilgan flagman tashabbusiga aylandi. Avvalgi tadbirlar Nyu-York (2018), London (2019), Yangi Dehli (2021), Seul (2022), Maynberg (Germaniya, 2023) va Durban (2024) da boʻlib oʻtgan. Endi Toshkent ushbu roʻyxatga Markaziy Osiyoning ushbu tadbirga mezbonlik qilayotgan birinchi shahri sifatida qoʻshildi.

Konferensiyada qator interaktiv yalpi majlislar va panel muhokamalari oʻtkazildi. Markaziy mavzulardan biri “Yogani anʼanaviy va zamonaviy sogʻliqni saqlash tizimlariga integratsiyalash” boʻlib, unda Markaziy Osiyoning mahalliy davolash anʼanalarini zamonaviy tibbiyot amaliyoti bilan qanday birlashtirish mumkinligiga qaratilgan.

Ekspertlar va amaliyotchilar shuningdek, Markaziy Osiyoda yoganing holati, uni kengroq qabul qilishdagi muammolar, hamkorlik imkoniyatlari va yoganing surunkali kasalliklarni boshqarishdagi roli kabi dolzarb masalalarni oʻrgandilar.

Konferensiya nafaqat yogani nishonlash, balki amaliy natijalarga erishish ham maqsad qilgan. Muhokamalar yakunida ishtirok etuvchi mamlakatlardagi manfaatdor tomonlarga rasmiy tavsiyalar taqdim etildi. Ular Yevrosiyo boʻylab yoga amaliyoti va taʼlimini institutlashtirishga yordam beradigan siyosatlar, oʻquv doiralari va qoʻshma loyihalarga qaratildi. Sogʻliq bilan bogʻliq muammolar murakkablashib borayotgan bir paytda, yoga individual fitnes, ruhiy bardoshlilik va ijtimoiy uygʻunlikka hissa qoʻsha oladigan oddiy, ammo chuqur amaliyot sifatida oʻrin olmoqda.

Toshkent konferensiyasi yoga umumiy ahamiyatining eslatmasi boʻlib xizmat qiladi. Qadimgi Hindistonning anʼanasi boʻlgan yoga endi salomatlik, muvozanat va tinchlik xabari orqali jamoalarni birlashtirgan millatlar oʻrtasidagi koʻprikka aylanmoqda.

“Xalq soʻzi”.