Prezident Shavkat Mirziyoyev Toshkent shahrida amalga oshirilgan ishlarni sarhisob qilish va kelgusi yilga yangi marralarni belgilab olishga bagʻishlangan yigʻilish oʻtkazmoqda.

Soʻnggi yillarda poytaxtimizda ulkan oʻzgarishlar yuz bergani taʼkidlandi.

Oʻtgan toʻqqiz yilda Toshkent shahri iqtisodiyotiga 20 milliard dollardan ortiq toʻgʻridan-toʻgʻri xorijiy investitsiya kiritildi, 5 mingga yaqin yirik loyiha ishga tushdi. Jon boshiga toʻgʻridan-toʻgʻri xorijiy investitsiya 2017-yildagi 71 dollardan 2,2 ming dollarga oshdi.

Shaharda tijorat maydonlari 14 karra koʻpayib, 67 million kvadrat metrga yetdi, tadbirkorlar soni 140 mingga yaqinlashdi.

Bunyodkorlik ishlari, yangi qurilgan savdo-servis va koʻngilochar obyektlar “tungi iqtisodiyot”ni rivojlantirdi. Tunu kun ishlaydigan savdo va xizmat koʻrsatish obyektlari soni 3 mingdan oshdi.

“Shahar piyodalar uchun” tamoyili asosida mahalla va koʻchalarda ijobiy oʻzgarishlarni odamlar kundalik hayotida sezayotganini oʻzlari aytmoqda. Toshkentga 1 mingta zamonaviy elektrobus va avtobus olib kelinib, 168 ta yangi yoʻnalish ochildi. Qoʻshimcha 33 kilometr metro liniyasi va 21 ta yangi stansiya qurildi. Yashnobod, Mirobod, Sergeli, Yangihayot va Yunusoboddagi 1 millionga yaqin aholiga metro xizmatlari yaqinlashdi.