AQSH Tolibonning yuqori martabali rahbarlarini qoʻlga olish uchun Usama bin Laden uchun belgilangandan kattaroq mukofot eʼlon qilishi mumkin, deb xabar bermoqda “Newsweek” nashri.

Maʼlumotlarga koʻra, Tolibon garovda ushlab turgan amerikaliklarning soni avval xabar qilingandan koʻproq boʻlishi mumkin. Agar bu maʼlumotlar oʻz tasdigʻini topsa AQSH Tolibon rahbariyatini qoʻlga olish uchun katta miqdordagi mukofot puli berishini eʼlon qilgan.

Taʼkidlanishicha, Tolibon hukumati 2022-yilning avgust oyida ish safarida boʻlib turgan ikki nafar amerikalikni hibsga olgan. Tolibon AQSH bilan munosabatlarni normallashtirishga intilayotgan bir vaqtda bu kabi mojarolar salbiy oqibatlarga olib kelishi mumkin.

“Tolibon xabar qilinganidan koʻra koʻproq amerikaliklarni garovda ushlab turgani haqida maʼlumot oldik. Agar bu rost boʻlsa, biz darhol ularning yuqori rahbarlarini qoʻlga olish uchun Bin Ladenni ushlash uchun eʼlon qilgan mukofot pulidan ham koʻprogʻini eʼlon qilishga tayyormiz”, — deb yozgan Rubio oʻzining X sahifasida.

Eslatib oʻtamiz, Marko Rubio 21-yanvar kuni 99 nafar senator ovozi bilan AQSH davlat kotibi lavozimiga tasdiqlangan edi.