Foto: Illustrativ

Toshkent viloyati IIBB Kiberxavfsizlik boʻlimi va Angren shahar IIB xodimlari tomonidan olib borilgan tezkor tadbirlar davomida mijoz tomonidan taʼmirlash uchun qoldirilgan telefon orqali pullarni oʻgʻirlagan shaxs qoʻlga olindi. Ushbu holat mijozning bank kartasidan noqonuniy mablagʻ oʻzlashtirilganligi bilan bogʻliq.

Maʼlum boʻlishicha, Angren shahrida yashovchi fuqaro ichki ishlar boshqarmasiga murojaat qilib, oʻzining bank kartasidan 9 million soʻm mablagʻ nomaʼlum shaxs tomonidan yechib olinganini maʼlum qilib, bu voqea yuzasidan qonuniy chora koʻrishni soʻragan. Natijada oʻtkazilgan surishtiruvlar davomida ushbu jinoyatni 31 yoshli shaxs (S.S.) sodir etgani oshkor boʻldi.

Tekshiruvlar shuni koʻrsatdiki, jabrlanuvchi telefoni nosoz boʻlgani sabab uni taʼmirlash uchun ustaga topshirgan. Telefonni taʼmirlash jarayonida usta telefon ichidagi mobil ilovalar orqali bank kartasiga kirish imkoniyatini qoʻlga kiritgan. Oradan vaqt oʻtib, fuqaroning hisobiga tushgan 9 million soʻm mablagʻni oʻz hisobiga oʻtkazib, shaxsiy ehtiyojlari uchun sarflab yuborgan.

Gumonlanuvchi (S.S.) protsessual tartibda ushlangan. Unga nisbatan Oʻzbekiston Respublikasi Jinoyat kodeksining 169-moddasi 3-qismi “b” bandi bilan jinoyat ishi qoʻzgʻatilgan. Tergov harakatlari davom etmoqda va ushbu jinoyat boʻyicha barcha holatlar oʻrganilmoqda.