Kitob — tafakkuring puchmoqlarini ochadi, yashnatadi. Shuning uchun ham hamma asr odamlari uni eʼzozlab, moʻtabar qiladilar. Xuddi non kabi koʻzga surtadilar. Yot va johillar nigohidan yashiradilar, kerak vaqtda tilloga ham alishmaydilar. Bir kitob uchun otilganlarni, jon fido qilganlarni bilamiz. Ular kimlar edi? Albatta, maʼrifatli maʼnaviyatchilar edi.

Maʼnaviyat — tanangdan boshqa hamma narsangdir. Yaʼniki, aqlu hushing, fahmu farosating, idrok va onging, ilmu salohiyating, shuur-tafakkuring, odobu fasohating, sharmu hayong, oru nomusing, ishqu muhabbating va hokazo...

Endi keling, odamzod atalmish mavjudotda joylashgan mana shu ikki maʼvoni taroziga tortaylik. Biologik vujud va ruhiy holat! Qaysi biri tosh bosadi?

Vujud degan koʻrinishingni sudrab yurar ekansan, uni faqat ruh degan ong goʻzal qiladi. Seni ulugʻlaydigan ham, qadringni baland qiladigan, hayotingni shukuhli, martabangni ulugʻ va alaloqibat ikki dunyoingni obod qiladigan, toʻgʻri va egri, oq va qora, savob va gunohni tanitgan ham oʻsha.

Demak, bizning oldimizda ikki yoʻl turibdi: vujudning gapiga kirib nafs balosi, manfaat va taʼma girdobiga gʻarq boʻlmoq, farzandlarimizning yot mafkuralar oqimiga choʻkib ketayotganiga tomoshabin boʻlib turish, ularni gʻayridin, gʻayrimillat odamlari qilib yetishtirib, kelajagimizni boy berish yoki insoniylik maqomini yuksaltirib halovatda yashamoq!

Yurtboshimizning Vatan va Xalq oldidagi muammolarni bosqichma-bosqich bartaraf etishdagi zukkoligi tahsinga loyiq. Bugungi kun maʼnaviyat fidoyilari boʻlmish ziyolilar qay holatda?! Vujud va ruhning beayov janglarida omonmi?! Iqtisodiy tanglik ularni qiynab qoʻymadimi?! Shunga oʻxshash yuzlab savollar koʻndalang boʻlib turgan bir paytda, Prezidentimizning bong urishlari ayni muddao boʻldi. “Maʼnaviy-maʼrifiy ishlar tizimini takomillashtirish” masalalari boʻyicha oʻtkazilgan videoselektorda muammolar va ayniqsa, ularning yechimi mohiyati oshkora aytilgani, chora-tadbirlar koʻrilajagi fikri uygʻoq ziyolilarni behad quvontirdi. Zero, soʻz borki, kitob bor, kitob borki, maʼnaviyat bor, maʼnaviyat borki, tinchlik, farovonlik, qut-baraka va baxt bor!

Farida BOʻTAYEVA,
Oliy Majlis Qonunchilik palatasi deputati