Китоб — тафаккуринг пучмоқларини очади, яшнатади. Шунинг учун ҳам ҳамма аср одамлари уни эъзозлаб, мўътабар қиладилар. Худди нон каби кўзга суртадилар. Ёт ва жоҳиллар нигоҳидан яширадилар, керак вақтда тиллога ҳам алишмайдилар. Бир китоб учун отилганларни, жон фидо қилганларни биламиз. Улар кимлар эди? Албатта, маърифатли маънавиятчилар эди.

Маънавият — танангдан бошқа ҳамма нарсангдир. Яъники, ақлу ҳушинг, фаҳму фаросатинг, идрок ва онгинг, илму салоҳиятинг, шуур-тафаккуринг, одобу фасоҳатинг, шарму ҳаёнг, ору номусинг, ишқу муҳаббатинг ва ҳоказо...

Энди келинг, одамзод аталмиш мавжудотда жойлашган мана шу икки маъвони тарозига тортайлик. Биологик вужуд ва руҳий ҳолат! Қайси бири тош босади?

Вужуд деган кўринишингни судраб юрар экансан, уни фақат руҳ деган онг гўзал қилади. Сени улуғлайдиган ҳам, қадрингни баланд қиладиган, ҳаётингни шукуҳли, мартабангни улуғ ва алалоқибат икки дунёингни обод қиладиган, тўғри ва эгри, оқ ва қора, савоб ва гуноҳни танитган ҳам ўша.

Демак, бизнинг олдимизда икки йўл турибди: вужуднинг гапига кириб нафс балоси, манфаат ва таъма гирдобига ғарқ бўлмоқ, фарзандларимизнинг ёт мафкуралар оқимига чўкиб кетаётганига томошабин бўлиб туриш, уларни ғайридин, ғайримиллат одамлари қилиб етиштириб, келажагимизни бой бериш ёки инсонийлик мақомини юксалтириб ҳаловатда яшамоқ!

Юртбошимизнинг Ватан ва Халқ олдидаги муаммоларни босқичма-босқич бартараф этишдаги зукколиги таҳсинга лойиқ. Бугунги кун маънавият фидойилари бўлмиш зиёлилар қай ҳолатда?! Вужуд ва руҳнинг беаёв жангларида омонми?! Иқтисодий танглик уларни қийнаб қўймадими?! Шунга ўхшаш юзлаб саволлар кўндаланг бўлиб турган бир пайтда, Президентимизнинг бонг уришлари айни муддао бўлди. «Маънавий-маърифий ишлар тизимини такомиллаштириш» масалалари бўйича ўтказилган видеоселекторда муаммолар ва айниқса, уларнинг ечими моҳияти ошкора айтилгани, чора-тадбирлар кўрилажаги фикри уйғоқ зиёлиларни беҳад қувонтирди. Зеро, сўз борки, китоб бор, китоб борки, маънавият бор, маънавият борки, тинчлик, фаровонлик, қут-барака ва бахт бор!

Фарида БЎТАЕВА,
Олий Мажлис Қонунчилик палатаси депутати