Avval xabar berganimizdek, shu kunlarda Oliy Majlis Senati Raisi Tanzila Narbayeva boshchiligidagi Oʻzbekiston delegatsiyasi rasmiy tashrif bilan Belarus Respublikasida boʻlib turibdi.

Bugun, 5-sentabr kuni, Tanzila Narbayeva Belarus Respublikasi Prezidenti Aleksandr Lukashenko bilan uchrashdi.

Maʼlumki, Belarus Oʻzbekistonning MDHdagi anʼanaviy hamkorlaridan biridir. Mamlakatlar oʻrtasidagi aloqalar doʻstlik va sheriklik ruhida izchil rivojlanib bormoqda.

Uchrashuv davomida ikki tomonlama hamkorlikni, jumladan, siyosiy, savdo-iqtisodiy, ilmiy-texnikaviy va madaniy-gumanitar aloqalarni mustahkamlash masalalari muhokama qilindi.

Suhbatda parlamentlararo muloqotni samarali rivojlanayotganligi, oʻzaro manfaatli uchrashuv va tadbirlar muntazam ravishda oʻtkazib borilayotganligi, MDH Parlamentlararo Assambleyasi hamda  Parlamentlararo ittifoq doirasida faol hamkorlik olib borilayotganligi alohida taʼkidlandi.

Oʻzbekiston va Belarus xalqaro va mintaqaviy tashkilotlar – BMT, MDH, SHHT doirasida konstruktiv hamkorlik qilmoqda.

Muloqot chogʻida Oʻzbekiston – Belarus biznes doiralari va tadbirkor ayollar birinchi biznes-forumiga alohida eʼtibor qaratildi. Ushbu tadbir ayollar tadbirkorligini rivojlantirishiga muhim hissa qoʻshishi, mamlakatlar oʻrtasidagi savdo-iqtisodiy aloqalarni mustahkamlash boʻyicha yangi taklif va tashabbuslarni muhokama qilish va ishlab chiqish uchun samarali maydonga aylanishi taʼkidlandi.

Erishilgan shartnoma va kelishuvlar ijrosi ustidan taʼsirchan parlament nazorati oʻrnatilishi ahamiyati haqida alohida toʻxtalib oʻtildi. Qoʻshma tadbirlar orqali gender tengligiga erishish va Belarus ayollar ittifoqi bilan hamkorlikni mustahkamlash zarurligi qayd etildi.

Uchrashuv davomida boshqa muhim masalalar yuzasidan ham fikr almashildi.