“Respublikaning hudud, soha va tarmoqlarida raqamli texnologiyalar joriy etilishini yanada jadallashtirish chora-tadbirlari toʻgʻrisida”gi Prezident qarori qabul qilindi. Bu haqida “huquqiy axborot” Telegram-kanali xabar berdi.

Unga koʻra, endilikda talabalar ijara toʻlovining bir qismini qaytarish boʻyicha my.gov.uz orqali murojaat qilishlari mumkin boʻladi. 2025-yilning 1-noyabr sanasidan boshlab davlat oliy taʼlim muassasalari talabalariga oylik ijara toʻlovining bir qismini qaytarish boʻyicha Yagona portal orqali murojaat qilish imkoniyati yaratiladi.

2026-yil 1-yanvardan oʻrta maxsus, kasbiy va oliy taʼlim tashkilotlarida taʼlim jarayoni bilan bogʻliq davlat xizmatlari Yagona portal orqali koʻrsatilishi belgilangan.

Shuningdek, 2026-yil 1-maydan nogironlikni belgilash boʻyicha davlat xizmatini koʻrsatishda fuqarolarga tibbiyot muassasalariga imtiyozli davolanish uchun beriladigan yoʻllanmani shakllantirish va elektron navbatga qoʻyish kompozit shaklda amalga oshiriladi.

Bundan tashqari, 2026-yil yakunigacha tibbiy koʻrik jarayonida shifokor nutqini avtomatik bayonlashtiruvchi ovozli yordamchi hamda bemorlarga tashxis qoʻyishda koʻmaklashuvchi sunʼiy intellektga asoslangan “Shifokorning raqamli yordamchisi” dasturi ishga tushiriladi.

2025-yil 1-noyabrdan transportga gaz baloni oʻrnatilganligiga oid maʼlumotlarni elektron shaklda yuritish orqali transport vositasini roʻyxatdan oʻtkazish guvohnomasini qayta rasmiylashtirish tartibi bekor qilinadi.