Yurtimiz ravnaqi, ertangi yorug‘ istiqbolimiz bugun kamol topayotgan har tomonlama salohiyatli, bilimli yosh kadrlarga chambarchas bog‘liq. Zero, ular o‘z ilmi, quvvai hofizasi, intiluvchanligi bilan taraqqiyot charxpalagini tezroq aylantira oladilar.

Shu ma’noda, ilmiy izlanishlar olib borayotgan va muayyan yutuqlarga erishayotgan yoshlar mamlakatimizning bebaho boyligidir. 

Ana shunday baxtli navqiron avlod safida hamkasbimiz — “Xalq so‘zi” va “Narodnoye slovo” gazetalari tahririyati davlat korxonasi bosh buxgalteri o‘rinbosari Nabijon Akramovning ham borligi jamoamiz a’zolariga cheksiz quvonch, faxr-iftixor bag‘ishlaydi.

Yosh olim kuni kecha iqtisodiyot fanlari bo‘yicha falsafa doktori (PhD) diplomini qo‘lga oldi. 

Nabijon Akramov ilmiy izlanishlarda yangi dovonni zabt etishda atoqli olimlarning etagini tutgan. Xususan, uning (PhD) diplomi uchun  olib borgan “To‘qimachilik korxonalarida strategik boshqarishni takomillashtirish” mavzusidagi tadqiqotiga AQSHning Nyu-York fanlar akademiyasi, shuningdek, Xalqaro axborotlashtirish akademiyasi a’zosi, iqtisodiyot fanlari doktori, professor Akrom Hoshimov ilmiy rahbarlik qildi. 

— O‘zbekistonda to‘qimachilik sanoati o‘zak tarmoqlardan biri sanalib, ushbu tarmoqni yanada rivojlantirish uchun xorijiy investisiyalarni jalb etish, sifat menejmenti tizimini joriy etish, boshqarishda innovasion usullarni qo‘llash borasida keng ko‘lamdagi amaliy ishlar olib borilmoqda, — deydi N. Akramov. — 2022-2026 yillarga mo‘ljallangan yangi O‘zbekistonning taraqqiyot strategiyasida “To‘qimachilik sanoati mahsulotlari ishlab chiqarish hajmini 2 barobarga ko‘paytirish” vazifasi belgilangan bo‘lib, mazkur vazifaning muvaffaqiyatli bajarilishi respublikamiz to‘qimachilik sanoati korxonalari strategik boshqarish mexanizmlarini takomillashtirishni taqozo etadi. Shu jihatdan biz olib borayotgan tadqiqotlar nihoyatda istiqbolli, deb o‘ylayman. Uning natijalari yurtimizda to‘qimachilik sanoati rivojida, pirovardida mamlakatimiz taraqqiyoti, hayotimiz farovonligida muhim o‘rin tutadi.

Ta’kidlash joizki, yosh olim o‘z izlanishlarini Toshkent to‘qimachilik va yengil sanoat institutining mustaqil tadqiqotchisi sifatida bajardi.

«Xalq so‘zi» va «Narodnoye slovo» gazetalari tahririyati jamoasi hamkasbimizga ilm-fan cho‘qqilarini zabt etishdek g‘oyat mashaqqatli, ayni damda sharafli ishda sog‘liq-omonlik, g‘ayrat-shijoat tilab qoladi.