Foto: Illustrativ surat

Surxondaryo viloyatida voyaga yetmagan shaxslarga noqonuniy ravishda diniy taʼlim berib kelgan yigit qoʻlga olindi. Bu holat mamlakat miqyosida oʻtkazilayotgan “Xavfsiz va sogʻlom yurt” keng koʻlamli profilaktik tadbirlari doirasida aniqlandi.

Ichki ishlar boshqarmasi va Davlat xavfsizlik xizmati xodimlari tomonidan oʻtkazilgan tekshiruvlar davomida 2000-yilda tugʻilgan fuqaro Boysun tumanidagi Darband mahallasida vaqtincha yashab kelayotgan xonadonida 2025-yil mart oyidan shu kunga qadar 9 nafar shaxsga moddiy manfaat evaziga hujra sharoitida diniy saboq bergani maʼlum boʻldi.

Achinarlisi, ushbu shaxs taʼlim jarayonida bolalarga nisbatan qoʻpol muomalada boʻlib, ularni ayovsiz kaltaklagan. Voyaga yetmaganlar olgan tan jarohatlarining ogʻirlik darajasini aniqlash maqsadida sud-tibbiy ekspertizasi tayinlandi.

Bolalarning ota-onalariga nisbatan esa Maʼmuriy javobgarlik toʻgʻrisidagi kodeksning 47-moddasi 1-qismi asosida huquqiy choralar koʻrilmoqda.

Hozirda yigitga nisbatan Jinoyat kodeksining tegishli moddalari bilan jinoyat ishi qoʻzgʻatilgan. Tergov harakatlari davom etmoqda.