Markaziy bank fuqarolarga hech qanday kredit bermasligi hamda moliyaviy xizmatlar koʻrsatmasligini eslatib, soxta xabarlarga ishonmaslik va firibgarlardan ogoh boʻlishga chaqirdi.

Soʻnggi kunlarda firibgarlar oʻzini Markaziy bank xodimi sifatida tanishtirib, fuqarolarning ishonchiga kirishga urinmoqda. Internet tarmogʻida soxta telefon raqamlari orqali qoʻngʻiroqlar qilish, shuningdek, Telegram messenjerida “Markaziy bank“ nomidan soxta kanallar yaratib, bank kartalari haqidagi maʼlumotlarni qoʻlga kiritish holatlari kuzatilmoqda. Bu orqali kartalardagi mablagʻlar oʻzlashtirilmoqda.

Markaziy bank matbuot xizmati firibgarlik xatti-harakatlariga eʼtibor qaratib, ushbu soxta xabarlar va akkauntlarning Markaziy bankka aloqasi yoʻqligini taʼkidladi.

Markaziy bank fuqarolarga quyidagilarni eslatadi:

— Markaziy bank jismoniy shaxslarga kreditlar ajratmaydi va moliyaviy xizmatlar koʻrsatmaydi.

— Shubhali qoʻngʻiroqlarga va soxta xabarlarga eʼtibor bermang.

— Bank kartalari maʼlumotlarini hech qachon uchinchi shaxslarga oshkor qilmang.

— Ijtimoiy tarmoqlardan foydalanishda faqat verifikatsiyalangan sahifalardan foydalaning.