Guliston shahrida “Yosh kitobxon oila” tanlovining Sirdaryo viloyati bosqichi oʻtkazildi. Ushbu tanlovda 2024-yilda 1986 ta yosh oila qatnashgan boʻlsa, joriy yilda unda ishtirok etish uchun onlayn platforma orqali 2519 ta yosh oila roʻyxatdan oʻtdi.

— “Yosh kitobxon oila” tanlovi yosh oilalarda kitobxonlik madaniyatini yuksaltirish, har bir oila aʼzosini kitob mutolaasiga keng jalb etish, ular oʻrtasida oʻzaro mehr-oqibat, odob-axloq fazilatlarini rivojlantirishda muhim ahamiyatga ega boʻlmoqda, — deydi Sirdaryo viloyati Yoshlar ishlari boshqarmasi yoshlar maʼnaviyatini yuksaltirish va boʻsh vaqtini mazmunli tashkil etish boʻyicha bosh mutaxassisi Doniyor Axrorqulov. — Tanlov ikkita shartdan iborat boʻlib, bu sinovlar mutolaa natijasida toʻplangan bilim va dunyoqarash darajasini aniqlab beradi. Aytish lozimki, bu yilgi tanlovda gʻoliblik uchun raqobat juda kuchli boʻldi. Bu albatta, yosh oilalar oʻrtasida kitobxonlik tobora rivojlanib borayotganidan dalolat.

Yakuniy natijalarga koʻra, Sayxunobod tumanida yashovchi Zaripovlar oilasi birinchi oʻrin sohibi boʻldi va tanlovning respublika bosqichida ishtirok etish huquqini qoʻlga kiritdi. Solijonovlar oilasi (Guliston tumani) ikkinchi, Mirsiddiqovlar oilasi (Xovos tumani) uchinchi oʻrinni egalladi.

Ahmadali ShERNAZAROV

“Xalq soʻzi”.