Kecha, 19-yanvar kuni Birlashgan Arab Amirliklari Pro ligasida 13-tur oʻyinlari boʻlib oʻtdi. Kun doirasidan oʻrin olgan oʻyinda Otabek Shukurov va Akmal Mozgavoy toʻp surayotgan “Baniyas” jamoasi oʻz maydonida Azizjon Gʻaniyev toʻp surayotgan “Al-Batayeh” jamoasini qabul qildi. Uchrashuv 1:1 hisobida yakunlandi.

“Baniyas” jamoasidan Otabek Shukurov asosiy tarkibda maydonga tushdi va toʻliq oʻyin oʻtkazdi. Uning harakatlari “Sofascore” tomonidan 6,7 ballga baholandi. Jamoada oʻynayotgan yana bir oʻzbekistonlik futbolchi Akmal Mozgavoy esa oʻyin qaydnomasidan oʻrin oldi, lekin maydonga tushirilmadi.

“Al-Batayeh” jamoasi futbolchisi Azizjon Gʻaniyev ham oʻyinni asosiy tarkibda boshladi va toʻliq oʻyin oʻtkazdi. Uning harakatlari “Sofascore” tomonidan 6,8 ballga baholandi.

Turni yakunlab bergan oʻyinda esa Oʻzbekiston milliy terma jamoasining yana bir futbolchisi Abdulla Abdullayev toʻp surayotgan “Al-Fujayra” jamoasi safarida “Shabab Al-Ahli” klubi mehmoni boʻldi. Oʻyin mezbonlarning yirik 7:0 hisobidagi gʻalabasi bilan yakunlandi. Abdullayev esa oʻyinni asosiy tarkibda boshladi va toʻliq oʻyin oʻtkazdi. Uning harakatlari “Sofascore” tomonidan 6,3 ballga baholandi.