Foto: Illustrativ foto

Joriy yilning 20-noyabr kuni Los-Anjelesda (AQSH) “Environmental Film & Screenplay Festival” ekologik filmlar festivali boʻlib oʻtdi. Unda Turizm va madaniy meros vazirligi tashabbusi bilan rejissyor Umid Hamdamov tomonidan suratga olingan “Shoʻrxok” qisqa metrajli filmi “Eng yaxshi operatorlik ishi” nominatsiyasida gʻolib boʻldi.

Taʼkidlash kerakki, filmga “Oʻzbekistonlik” kartinasidagi faoliyati bilan ham tanilgan Jahongir Ibrohimov operatorlik qilgan.

Maʼlumot uchun, “Aral Dream” loyihasi doirasida suratga olingan “Shoʻrxok” Orol dengizi bilan chambarchas bogʻliq boʻlgan xalqlar tarixi haqida hikoya qiladi. Filmdan maqsad Orolboʻyi muammolarini jahon sahnasiga olib chiqishdir.

Qayd etish joizki, AQSHdagi festivalda tomoshabinlar filmni koʻrishdan oldin Orol dengizi va uning muammolari haqida hech qachon eshitmaganliklarini taʼkidladilar. Filmdan soʻng esa ularda mintaqaga tashrif buyurish yoki u haqida koʻproq bilishga qiziqish uygʻonmoqda. Vaholanki, kino ijodkorlarining maqsadi ham aynan shu – keng jamoatchilik eʼtiborini jalb qilish edi.

Yana bir maʼlumot, “Shoʻrxok” 4-noyabr kuni AQSHda “Florida Environmental Film Festival” ekologik filmlar festivalida ham ishtirok etdi.