Foto: Jo‘qorg‘i Kenges

Qoraqalpogʻiston Respublikasi Joʻqorgʻi Kengesining qaroriga asosan Shoxrux Azamatovich Aminov Qoraqalpogʻiston Respublikasi prokurori lavozimiga tayinlandi. Bu haqda Kenges matbuot xizmati xabar berdi.

Qayd qilinishicha, bugun, 1-avgust kuni Qoraqalpogʻiston Respublikasi Joʻqorgʻi Kengesining navbatdan tashqari oltinchi sessiyasi boʻlib oʻtgan. Unda Oʻzbekiston Respublikasi Bosh prokurori Nigʻmatilla Yoʻldoshev ishtirok etgan.

Sessiya kun tartibidagi masala yuzasidan deputatlar qaror qabul qilib, Aminov Shoxrux Azamatovich Qoraqalpogʻiston Respublikasi prokurori lavozimiga tayinlangan.

Maʼlumot uchun, Shoxrux Aminov 1981-yilda tugʻilgan, 2002-yilda Samarqand davlat universitetini tamomlagan — maʼlumoti oliy. U prokuratura organlaridagi ish faoliyatini 2004-yilda boshlab, Samarqand viloyat prokuraturasi organlarida turli lavozimlarda ishlagan.

Aminov, shuningdek, Bosh prokuratura boshqarma prokurori, katta prokurori, boshqarma boshligʻi oʻrinbosari, boshqarma boshligʻi, Toshkent viloyat prokurorining oʻrinbosari, MIB direktori oʻrinbosari, Sirdaryo viloyati prokurori, Navoiy viloyati prokurori lavozimlarida faoliyat olib borgan.