Oʻzbekiston Respublikasi Prezidenti Shavkat Mirziyoyev va Rossiya Federatsiyasi Prezidenti Vladimir Putin 3-may kuni boʻlib oʻtgan telefon orqali muloqotda mamlakatlarimiz oʻrtasidagi keng qamrovli strategik sheriklik va ittifoqchilik munosabatlarini yanada rivojlantirish va mustahkamlashning dolzarb masalalarini muhokama qildilar.

Rossiya Prezidentining oʻtgan yil may oyidagi Oʻzbekistonga davlat tashrifi davomida erishilgan kelishuvlarni amalga oshirish natijalari koʻrib chiqildi.

Oʻzaro tovar ayirboshlash surʼatini saqlab qolish, iqtisodiyotning ustuvor tarmoqlarida kooperatsiya loyihalarini jadallashtirish, hududlar va biznes darajasidagi faol muloqotlarni davom ettirishga qaratilgan muvofiqlashtirilgan chora-tadbirlarni qabul qilish muhim ekani taʼkidlandi.

Shu maʼnoda, Toshkent shahrida beshinchi «Innoprom. Markaziy Osiyo" xalqaro sanoat koʻrgazmasi doirasida boʻlib oʻtgan ishbilarmonlik tadbirlarining samarali natijalari yuksak baholandi.

Gumanitar hamkorlik, eng avvalo, madaniyat, sanʼat, fan va taʼlim, sport va turizm sohalarida kengayib borayotgani mamnuniyat bilan qayd etildi.

Oʻzbekiston va Rossiya yetakchilari xalqaro kun tartibidagi masalalar yuzasidan ham fikr almashib, boʻlajak uchrashuvlar rejasini muhokama qildilar.