Oʻzbekiston Respublikasi Prezidenti Shavkat Mirziyoyev 28-avgust kuni mamlakatimizda amaliy tashrif bilan boʻlib turgan Amerika Qoʻshma Shtatlari Prezidentining global sherikliklar boʻyicha maxsus vakili Paolo Zampollini qabul qildi.

AQSH maʼmuriyatining yuqori martabali vakili davlatimiz rahbariga Prezident Donald Trampning samimiy salomi va Oʻzbekiston mustaqilligi kuni munosabati bilan tabriklarini yetkazdi.

Uchrashuvda Oʻzbekiston bilan AQSH oʻrtasidagi strategik sheriklik va koʻp qirrali hamkorlik munosabatlarini yanada kengaytirish masalalari atroflicha koʻrib chiqildi.

Turli darajalarda samarali aloqalar davom etayotgani alohida mamnuniyat bilan qayd etildi. Konstruktiv siyosiy muloqot rivojlanmoqda, faol parlamentlararo almashinuvlar amalga oshirilmoqda. Oʻtgan oyda Kongressda Oʻzbekiston kuni doirasidagi tadbirlar oʻtkazildi, bu yil kuzda Kengaytirilgan strategik sheriklik muloqotining birinchi yigʻilishi boʻlib oʻtadi.

Xavfsizlik sohasida, terrorizm, ekstremizm va noqonuniy migratsiyaga qarshi kurashish borasida samarali hamkorlik yoʻlga qoʻyilgan.

AQSH anʼanaviy ravishda Oʻzbekistonning muhim iqtisodiy hamkori hisoblanadi. 2024-yilda tovar ayirboshlash hajmi 15 foizga koʻpaydi. Loyihalar portfeli 11 milliard dollardan oshgan.

Joriy yil iyun oyida oʻtkazilgan Toshkent investitsiya forumida AQSHning 100 dan ortiq yetakchi kompaniyalari ishtirok etdi.

Mineral resurslar, aviatsiya, elektrotexnika, qishloq xoʻjaligi, raqamli texnologiyalar, moliya, innovatsiyalar, taʼlim va boshqa ustuvor yoʻnalishlarda kooperatsiya loyihalarini ilgari surish uchun katta salohiyat mavjudligi qayd etildi.

“S5+1” formati doirasida mintaqaviy hamkorlikni rivojlantirish muhim ekani taʼkidlandi.

Boʻlajak muloqotlar va qoʻshma tadbirlar rejasi ham koʻrib chiqildi.