Foto: Akmal Muhammadov, Yunus Boʻriyev / “Xalq soʻzi”

Oliy Majlis Senatining bugungi yalpi majlisida “Yoqilgʻi-energetika sohasidagi huquqbuzarliklarga qarshi kurashish choralari takomillashtirilishi munosabati bilan Oʻzbekiston Respublikasining Jinoyat kodeksiga hamda Oʻzbekiston Respublikasining Maʼmuriy javobgarlik toʻgʻrisidagi kodeksiga oʻzgartirish va qoʻshimchalar kiritish haqida”gi Qonun muhokama qilindi.

Muhokama davomida senatorlar keyingi yillarda mamlakatimizda yoqilgʻi-energetika resurslari bilan bogʻliq huquqbuzarliklarning oldini olish hamda energiyani tejash, undan oqilona foydalanish va energiya samaradorligini oshirish sohasidagi ishlarni tizimli ravishda yoʻlga qoʻyish masalalariga alohida eʼtibor qaratdi.

Shuningdek, ushbu sohada taʼsirchan davlat nazoratini taʼminlash borasida keng koʻlamli ishlar amalga oshirilayotganligi qayd etilib, yoqilgʻi-energetika resurslari bilan bogʻliq huquqbuzarliklarning oldini olish boʻyicha tegishli choralar koʻrish, elektr va issiqlik energiyasini behuda sarflash, gazdan yoqilgʻi yoki xomashyo sifatida foydalanishga oid huquqbuzarliklarni sodir etganlik uchun javobgarlikka tortish choralarini takomillashtirish lozimligi taʼkidlandi.

Mazkur Qonun bilan Jinoyat kodeksida elektr, issiqlik energiyasidan, gaz va suv oʻtkazgichdan foydalanish qoidalarini buzganlik uchun jazo choralarini kuchaytirish nazarda tutilmoqda.

Bundan tashqari, Maʼmuriy javobgarlik toʻgʻrisidagi kodeksga huquqni qoʻllash amaliyotidagi noaniqliklarni bartaraf etishga, yakka tartibdagi tadbirkorlar tomonidan yoqilgʻi-energetika resurslaridan foydalanishdagi huquqbuzarliklar sodir etilishining oldini olishga hamda bunday qoidabuzarliklar uchun jazo choralarining taʼsirchanligini oshirishga qaratilgan oʻzgartirishlar kiritilmoqda.

Senatorlar oʻz chiqishlarida ushbu Qonun yoqilgʻi-energetika resurslari bilan bogʻliq huquqbuzarliklarning oldini olish hamda iqtisod qilingan energiya resurslarini sanoatning boshqa tarmoqlariga yoʻnaltirish, qolaversa ularni eksportini oshirib, import ulushini kamaytirishga xizmat qilishini taʼkidlab oʻtdi.

Muhokama yakunida Qonun senatorlar tomonidan maʼqullandi.