Joriy yilning 25-noyabr kuni Dushanbe shahrida Markaziy Osiyo mamlakatlari yetakchi ayollari muloqotining “Ayollar tinchlik va xavfsizlik” mavzusida boʻlib oʻtgan yakunlovchi tadbirida Oʻzbekiston delegatsiyasi tarkibida Oliy Majlis Senati aʼzosi Jamila Bobonazarova ishtirok etdi.

Mazkur tadbir doirasida Markaziy Osiyoda tinchlik va xavfsizlikni mustahkamlash, tinchlik va xavfsizlik sohasida faol ayollar va yoshlarning birgalikdagi saʼy-harakatlari, Markaziy Osiyo ayollari muloqotining ikkinchi bosqichidagi raisligini navbatdagi ishtirokchi mamlakatga topshirish hamda afgʻon ayollarini qoʻllab-quvvatlashda taʼlim va tadbirkorlikning tayanch oʻrni mavzulariga bagʻishlangan panel sessiyalarida qizgʻin muhokamalar oʻtkazildi.

Tadbir davomida joriy yilning 12-noyabr kuni Toshkent shahrida “Xotin-qizlar huquqlari va gender tenglikni taʼminlashda global hamda mintaqaviy yondashuvlar” mavzusida Oʻzbekiston Respublikasi tashabbusi bilan tashkil qilingan Muloqot majlisining mintaqaviy rivojlanish tarixida yangi davrni boshlab berganligi eʼtirof etildi.

Ishtirokchilar tomonidan Oʻzbekistonning mazkur Muloqot majlisi doirasidagi tinchlik va xavfsizlikni qoʻllab-quvvatlash, gender tenglikni taʼminlash, butun mintaqada Muloqotning samarali ishlashi uchun tashkiliy, institutsional jihatdan takomillashtirish boʻyicha tashabbuslariga yuqori baho berildi.

Shuningdek, 2026-yilda Markaziy Osiyo mamlakatlari yetakchi ayollari muloqotiga Oʻzbekiston raislik qilishi qayd etildi.